25 ივნისს, გაიმართა აჭარის ავტონომიური რესპუბლიკის უმაღლესი საბჭოს ღია მმართველობის საბჭოს საკონსულტაციო ჯგუფის ონლაინ შეხვედრა. საკონსულტაციო ჯგუფის შეხვედრის გახსნით ნაწილში, “ინფორმაციის თავისუფლების განვითარების ინსტიტუტის“ (IDFI) დირექტორმა, და ღია მმართველობის პარტნიორობის (OGP) მმართველი კომიტეტის წევრმა, გიორგი კლდიაშვილმა, საკონსულტაციო ჯგუფის წევრ არასამთავრობო ორგანიზაციებს გაუზიარა საქართველოში ღია მმართველობის პარტნიორობის პრინციპების დანერგვის გამოცდილება. UNDP-ის პროექტის ოფიცერმა, ირინე ურუშაძემ, საკონსულტაციო ჯგუფის წევრებს მიაწოდა ინფორმაცია ევროკავშირისა (EU) და გაეროს განვითარების პროგრამის (UNDP) ერთობლივი პროექტის „საპარლამენტო დემოკრატიის კონსოლიდაცია საქართველოში“ შესახებ. აღნიშნული პროექტის ფარგლებში, „ინფორმაციის თავისუფლების განვითარების ინსტიტუტთან“ (IDFI) მჭიდრო თანამშრომლობის საფუძველზე ხორციელდება საქართველოს პარლამენტისა და აჭარის ავტონომიური რესპუბლიკის უმაღლესი საბჭოს OGP-ში ჩართულობის ხელშეწყობა.

შეხვედრის მიმდინარეობისას, IDFI-ს ღია მმართველობის მიმართულების ხელმძღვანელმა დავით მაისურაძემ, საკონსულტაციო ჯგუფის წევრებს გააცნო ღია მმართველობის პარტნიორობის პრინციპები, გამოწვევები, სამოქმედო გეგმის ვალდებულებების შემუშავება და სამოქმედო გეგმის შექმნისა და განხორციელების პროცესში სახელმწიფო უწყებებთან თანამშრომლობის მნიშვნელობა. საკონსულტაციო ჯგუფის წევრები შეთანხმდნენ მუშაობის ერთობლივ ფორმატზე.

საკონსულტაციო ჯგუფი შედგება საერთაშორისო და აჭარაში მომუშავე ადგილობრივი სამოქალაქო საზოგადოების ორგანიზაციებისგან. საკონსულტაციო ჯგუფი აჭარის ავტონომიური რესპუბლიკის უმაღლესი საბჭოს ღია მმართველობის საბჭოს წარუდგენს წინადადებებსა და რეკომენდაციებს სამოქმედო გეგმის შემუშავების პროცესში, ასევე, გაუწევს დახმარებას უფლებამოსილების ეფექტიანად განხორციელებაში.