23 დეკემბერს აჭარის უმაღლესი საბჭოს ღია მმართველობის საბჭოსა და საკონსულტაციო ჯგუფის შემაჯამებელი შეხვედრა გაიმართა, სადაც უმაღლესი საბჭოს 2020-2021 წლების ღია მმართველობის სამოქმედო გეგმის შესრულება განიხილეს. 

უმაღლესმა საბჭომ სამოქმედო გეგმით გათვალისწინებული 15 ვალდებულებიდან უდიდესი ნაწილი უკვე სრულად შეასრულა ან მიმდინარე ეტაპზეა. 

მოქალაქეთა ჩართულობის, საბჭოს ანგარიშვალდებულებისა და გამჭვირვალობის გაზრდის მიზნით მომზადდა და განხორციელდა შესაბამისი ცვლილებები რეგლამენტში, დაინერგა პეტიციის ინსტიტუტი, ადაპტირდა უმაღლესი საბჭოს ვებგვერდი, დასრულების ეტაპზეა მოქალაქეთა ჩართულობის ცენტრის ფიზიკური სივრცის მოწყობა, ხოლო 2022 წლის დასაწყისიდან ამოქმედდება მოქალაქეთა ჩართულობის ელექტრონული პლატფორმა, რომელიც საშუალებას მისცემს ნებისმიერ პირს ელექტრონულად, სახლიდან გაუსვლელად მიიღოს საბჭოს მუშაობაში მონაწილეობა - უყუროს სხდომების პირდაპირ ტრანსლაციას, კანონპროექტებზე გააკეთოს კომენტარი, წარადგინოს პეტიცია ელექტრონულად, დაგეგმოს შეხვედრა დეპუტატთან, გაგზავნოს წერილი ელექტრონულად და მიიღოს სხვა ციფრული სერვისები. 

შეხვედრა წარიმართა დისკუსიის რეჟიმში, გამოითქვა უმაღლესი საბჭოსა და სამოქალაქო სექტორს შორის თანამშრომლობის გაგრძელების სურვილი და ძირითად გამოწვევად დასახელდა ღია მმართველობის პრინციპების დანერგვის მდგრადობის შენარჩუნება უმაღლესი საბჭოს საქმიანობაში. საკონსულტაციო ჯგუფის მხრიდან დადებითად შეფასდა უმაღლესი საბჭოს მიერ სამოქმედო გეგმით გათვალისწინებული ვალდებულებების შესრულებისთვის გადადგმული ნაბიჯები. 

სამუშაო შეხვედრა გაიმართა ევროკავშირისა (EU) და გაეროს განვითარების პროგრამის (UNDP) პროექტის - „საპარლამენტო დემოკრატიის კონსოლიდაცია საქართველოში“ ფარგლებში. პროექტი მჭიდროდ თანამშრომლობს ინფორმაციის თავისუფლების განვითარების ინსტიტუტთან (IDFI), საქართველოს პარლამენტსა და აჭარის უმაღლეს საბჭოში ღია მმართველობის პრინციპების დანერგვის ხელშეწყობის მიზნით.