2021 წლის 11 ივნისს, ინფორმაციის თავისუფლების განვითარების ინსტიტუტმა (IDFI), როგორც მონაცემთა გლობალური ბარომეტრის (GDB) რეგიონულმა ჰაბმა, ეროვნული მკვლევრების ტრენინგი ჩაატარა.

IDFI მონაცემების გლობალური ბარომეტრის პროექტს და მის რეგიონულ ჰაბებს 2020 წლის შემოდგომაზე შეუერთდა. IDFI ცენტრალური აზიისა და აღმოსავლეთ ევროპის რეგიონული ჰაბი გახდა და პასუხისმგებელია 12 ქვეყნის შეფასების კოორდინაციაზე: სომხეთი, აზერბაიჯანი, ბელარუსი, საქართველო, ყაზახეთი, ყირგიზეთი, მონღოლეთი, მოლდოვა, ტაჯიკეთი, თურქმენეთი, უკრაინა და უზბეკეთი.

ტრენინგი მიზნად ისახავდა ეროვნული მკვლევრებისთვის GDB-ის მეთოდოლოგიის გაცნობას. მომავალში მათ ამ მეთოდოლოგიით შესაბამის ქვეყნებში ღია მონაცემების ხელმისაწვდომობა უნდა შეაფასონ. კერძოდ, მონაცემების შეგროვების ეტაპი ივნისის შუა რიცხვებიდან დაიწყება და აგვისტოს ბოლომდე გასტანს.

ტრენინგის მონაწილეებმა მიიღეს ზოგადი ინფორმაცია GDB-ის სტრუქტურასა და მიზნებზე. კერძოდ, ისინი დეტალურად გაეცნენ ინდექსის მეთოდოლოგიას და განიხილეს შეფასების ცალკეული გარემოებები. მონაწილეები ასევე გაეცნენ კვლევითი ინსტრუმენტის ონლაინ მექანიზმს და შესაფასებელი ინდიკატორების მახასიათებლებს.

ტრენინგს IDFI-ს მხრიდან უძღვებოდნენ თეონა ტურაშვილი და დავით ერისთავი, მონაცემების გლობალური ბარომეტრის გუნდიდან კი ვერონიკა კრეტუ.

IDFI-სა და ცენტრალური აზიისა და აღმოსავლეთ ევროპის ქვეყნების მკვლევრების ჩართულობა მონაცემების გლობალური ბარომეტრის პროექტში მხარდაჭერილია გაეროს მოსახლეობის ფონდის (UNFPA) აღმოსავლეთ ევროპისა და ცენტრალური აზიის რეგიონული ოფისის მიერ.

მონაცემების გლობალური ბარომეტრის (GDB) შესახებ დამატებითი ინფორმაციისთვის ეწვიეთ ვებგვერდს: www.globaldatabarometer.org