რუსული კანონის აღსასრულებლად, 2024 წლის 1 აგვისტოს, საქართველოს იუსტიციის მინისტრის ბრძანებით, დამტკიცდა “უცხოური ძალის ინტერესების გამტარებელ ორგანიზაციათა რეესტრის წარმოების, საფინანსო დეკლარაციის წარდგენისა და მონიტორინგის წესი”. აღნიშნულ ბრძანების მიხედვით დამტკიცებული საფინანსო დეკლარაციის ფორმა, რომელიც თავის მხრივ 12 ნაწილისგან შედგება, ითვალისწინებს მაქსიმალურად დეტალიზირებული ფინანსური ინფორმაციის წარდგენის ვალდებულებას, რაც შემდგომ მასტიგმატიზირებელ და ღირსების შემლახავ რეესტრში უნდა გამოქვეყნდეს. ფორმა მათ შორის ითვალისწინებს როგორც ორგანიზაციაში დასაქმებული, ასევე ორგანიზაციასთან ნებისმიერ ფინანსურ ურთიერთობაში მყოფი ნებისმიერი სხვა ფიზიკური პირის სხვადასხვა სახის პერსონალური ინფორმაციის გამოქვეყნებას. 

რუსული კანონით გათვალისწინებული საფინანსო დეკლარაციის არსებული ფორმის დამტკიცების შემდეგ, ნეტგაზეთმა პერსონალურ მონაცემთა დაცვის სამსახურს მიმართა პერსონალურ მონაცემთა დაცვის არსებულ სტანდარტებთან შესაბამისობის შეფასების თხოვნით. სამსახურმა ნეტგაზეთს განუმარტა რომ აღნიშნული ფორმა “შინაარსობრივი თვალსაზრისით თანხვედრაშია მონაცემთა დამუშავების მინიმიზაციის, პროპორციულობისა და თანაზომიერების პრინციპებთან”.

               წყარო : ნეტგაზეთის მიერ გამოქვეყნებული სტატია. 

პერსონალურ მონაცემთა დაცვის სამსახურის აღნიშნული შეფასების გაცნობის შემდეგ, IDFI-მ სამსახურს მიმართა მათ მიერ გაწეული სხვადასხვა ხარჯის შესახებ ინფორმაციის მოთხოვნით, იმ სახით როგორი ფორმითაც  გამოქვეყნება დაევალათ არასამეწარმეო და მედია ორგანიზაციებს რუსული კანონის შესაბამისად.  მაგალითად, IDFI-მ პერსონალურ მონაცემთა დაცვის სამსახურიდან გამოითხოვა შემდეგი ინფორმაცია:

 - 2024 წელს თითოეულ თანამშრომელზე  გაცემული შრომის ანაზღაურების ოდენობა (სარგო, ფულადი ჯილდო, დანამატი ცალ-ცალკე), შრომის ანაზღაურების მიმღები პირების პირადი მონაცემების (სახელი, გვარი, პირადი ნომერი, საბანკო ანგარიში) მითითებით;  

- 2024 წელს თითოეულ თანამშრომელზე  გაწეული სამივლინებო ხარჯების ოდენობა (მგზავრობა, სასტუმრო, დღიური ცალ-ცალკე) და მივლინების მიზანი. მივლინებაში მყოფი პირების პირადი მონაცემების (სახელი, გვარი, პირადი ნომერი, საბანკო ანგარიში) მითითებით;

- 2024 წელს გაწეული საკონსულტაციო, სანოტარო, თარჯიმნის და თარგმნის მომსახურების ხარჯების ჩამონათვალი,  შესაბამისი მომსახურების გამწევი პირების პირადი მონაცემების (სახელი, გვარი/სახელწოდება, პირადი ნომერი/საიდენტიფიკაციო ნომერი, საბანკო ანგარიში) მითითებით;

-2024 წელს გაწეული სარეკლამო ხარჯების (სატელივიზიო, ბეჭდური, ინტერნეტ რეკლამა, ბრენდირებული აქსესუარები, გარე რეკლამა და სხვა სარეკლამო ხარჯები)  ჩამონათვალი შემსრულებელი კომპანიის/პირის, საიდენტიფიკაციო ნომერის, თანხის მიმღების საბანკო ანგარიშის, რეკლამის ტირაჟის/ხანგრძლივობის, ფართობის (ბეჭდური და ინტერნეტ რეკლამის შემთხვევაში) და ერთეულის ღირებულების (ლარი) მითითებით.

პერსონალურ მონაცემთა დაცვის სამსახურმა განმარტა, რომ IDFI-ს მიერ მოთხოვნილი ინფორმაცია შეიცავდა პერსონალურ მონაცემებს და თანამდებობის პირებთან (პერსონალურ მონაცემთა დაცვის სამსახურის უფროსი, მისი პირველი მოადგილე და მოადგილე) დაკავშირებული მონაცემების გარდა, ყველა სხვა თანამშრომელთან (და სხვა ფიზიკურ პირთან) დაკავშირებული ინფორმაცია წარმოდგენილ იქნა დეპერსონალიზირებული (დაშტრიხული) ფორმით.  ამასთან, მაგალითად თანამდებობის პირების შემთხვევაშიც არ იქნა წარმოდგენილი მათი საბანკო ანგარიშის ნომრები.

IDFI მიიჩნევს, რომ როგორც თავად რუსული კანონი, ასევე მის საფუძველზე შემუშავებული საფინანსო დეკლარაციის ფორმა არ შეესაბამება პერსონალურ მონაცემთა დაცვის სტანდარტებს. ამავდროულად, საყურადღებოა, რომ რუსული კანონი სამოქალაქო და მედია ორგანიზაციებს უწესებს ისეთი პერსონალური ინფორმაციის წარდგენის და გასაჯაროების ვალდებულებას, რომელთა ხელმისაწვდომობაც კანონით შეზღუდულია, მაგალითად საჯარო სექტორთან მიმართებით. აღნიშნული კი კიდევ ერთხელ ადასტურებს რუსული კანონის რეპრესიულ ბუნებას.