ღია მმართველობის პარტნიორობა (OGP) ერთ-ერთი ყველაზე მასშტაბური საერთაშორისო ინიციატივაა, რომელიც მიზნად ისახავს ხელისუფლების გამჭვირვალობისა და ანგარიშვალდებულების ზრდას. აღნიშნული ინიციატივის ფარგლებში მთავრობები, სასამართლო, საკანონმდებლო და ადგილობრივი ხელისუფლებები ნებაყოფლობით ახორციელებენ დემოკრატიული მმართველობის გაუმჯობესებისთვის მიმართულ რეფორმებს.

აჭარის უმაღლესმა საბჭომ გადაწყვიტა ღია მმართველობის პრინციპების სისტემური გაზიარება და 2020 წლის 30 აპრილის რიგგარეშე პლენარულ სხდომაზე დაამტკიცა რეგლამენტში შესატანი ცვლილება, რომლის თანახმად უმაღლეს საბჭოში იქმნება მუდმივმოქმედი ორგანო - ღია მმართველობის საბჭო. აღნიშნული საბჭო ხელს შეუწყობს უმაღლეს საბჭოში ღია მმართველობის პრინციპების დანერგვას, რეგიონის საკანონმდებლო ორგანოს გაძლიერებას ინსტიტუციური ღიაობისა და გამჭვირვალობის თვალსაზრისით. ღია მმართველობის საბჭო გაზრდის საზოგადოების ინფორმირებულობას საკანონმდებლო ორგანოს საქმიანობასთან დაკავშირებით, რაც თავის მხრივ უზრუნველყოფს უმაღლესი საბჭოს ანგარიშვალდებულებისა და მის საქმიანობაში მოქალაქეთა ჩართულობის გაზრდას.

გაეროს განვითარების პროგრამა (UNDP) და ინფორმაციის თავისუფლების განვითარების ინსტიტუტი (IDFI), გამოთქვამენ მზაობას, აჭარის უმაღლეს საბჭოს შესაბამისი მხარდაჭერა აღმოუჩინონ პროექტის - „ღია მმართველობის პრინციპების ხელშეწყობა საქართველოს პარლამენტსა და აჭარის ავტონომიური რესპუბლიკის უმაღლეს საბჭოში“ ფარგლებში. აღნიშნული პროექტი წარმოადგენს ევროკავშირისა (EU) და გაეროს განვითარების პროგრამის (UNDP) პროექტის - „საპარლამენტო დემოკრატიის კონსოლიდაცია საქართველოში“ ფართო ინიციატივის ნაწილს.