საქართველოში ელ-მმართველობასა და ელ-გამჭვირვალობასთან დაკავშირებული სამართლებრივი ბაზის მოკლე მიმოხილვა

საქართველოში ელექტრონულ მმართველობასა და ელექტრონულ გამჭვირვალობასთან დაკავშირებული სამართლებრივი ბაზის  მოკლე მიმოხილვა ცხადყოფს სამომავლო სამართლებრივი რეგულირების საჭიროებას. უპირველეს ყოვლისა, უნდა აღინიშნოს, რომ სახელმწიფო მმართველობის ელექტრონულ ფორმაზე გადაყვანა საწყის სტადიაზე იმყოფება. არსებითია ის გარემოება, რომ მოცემულ ეტაპზე არსებული სამართლებრივი ბაზა თანაბარწილად დაბალ დონეზეა წარმოდგენილი როგორც სახელმწიფო ორგანოებისათვის და საჯარო მოხელეებისათვის, ასევე მოქალაქეებისათვის და ბიზნესისათვის ელ-მმართველობის შემთხვევებში. დაბალ დონეზეა წარმოდგენილი ელ-ჩართულობისა და ელ-კონსულტაციის ინსტიტუტები, და შეიძლება ითქვას, რომ ჯერჯერობით არ არის დამკვიდრებული ელ-მართულობის მარეგულირებელი სამართლებრივი ბაზა. საქართველოს მოქმედი კანონმდებლობა არ ითვალისწინებს საჯარო ინფორმაციის ელექტრონული ფორმით მიღებაზე დაკონკრეტებას, არ არის გათვალისწინებული საჯარო დაწესებულებათა ვებ-გვერდებზე არსებული მიმართვის ელექტრონული ფორმებით გაგზავნილ შეკითხვებზე იურიდიული ძალის მქონე პასუხების მიღების საშუალება, რაც აგრეთვე შეიძლება გათანაბრდეს მოქმედი კანონმდებლობით გათვალისწინებული საჯარო ინფორმაციის მოთხოვნა-გაცემის უკვე არსებულ ფორმასთან. რაც შეეხება ელ-გამჭვირვალობის მარეგულირებელ ერთიან სამართლებრივ ბაზას, შეიძლება ითქვას, რომ ის საერთოდ არ არსებობს. საჯარო დაწესებულებების ოფიციალურ ვებ-გვერდებზე არ არის დანერგილი ინფორმაციის პროაქტიულად გამოქვეყნების სტანდარტები. ამავე დროს, არ არის სახეზე ერთიანი სამართლებრივი ნორმა, რომელიც დაავალდებულებდა ყველა საჯარო დაწესებულებას - საზოგადოებასთან ურთიერთობის, ანგარიშვალდებულების, საჯაროობისა და ინფორმაციულობის ხარისხის გაზრდის მიზნით - იქონიოს ოფიციალური ვებ-გვერდი.

მიუხედავად არსებული პრობლემატიკისა უნდა აღინიშნოს, რომ ელ-გამჭვირვალობის (იშვიათ შემთხვევებში) და განსაკუთრებით, ელ-მმართველობის სფეროების მარეგულირებელი ნორმები მართებული მიმართულების დასახვის შემთხვევაში შეიძლება მოაზრებულ იქნენ, როგორც ხსენებული სფეროების სამომავლო სამართლებრივი რეგულირების მეტ-ნაკლებად მყარ საფუძვლად.

დაწვრილებით იხილეთ შემდეგი ბმული:

საქართველოში ელ-მმართველობასა და ელ-გამჭვირვალობასთან დაკავშირებული სამართლებრივი ბაზის მოკლე მიმოხილვა