28 სექტემბერს, ინფორმაციის თავისუფლების საერთაშორისო დღეს IDFI-მ ცნობიერების ამაღლების მიზნით გამართა საჯარო ლექცია და დაარიგა სხვადასხვა ტიპის ბეჭდური მასალა.

საჯარო ლექცია - „ინფორმაციის თავისუფლება საქართველოში“ თბილისის სახელმწიფო უნივერსიტეტში გაიმართა. IDFI-ს იურისტმა და ანალიტიკოსმა, ნინო მერებაშვილმა, სახალხო დამცველის აპარატის სამოქალაქო, პოლიტიკური, ეკონომიკური, სოციალური და კულტურული უფლებების დაცვის დეპარტამენტის უფროსმა, თათული თოდუამ და სტუდია „მონიტორის“ ჟურნალისტმა სალომე ცეცხლაძემ დამსწრე სტუდენტებისთვის მცირე მოხსენებები გააკეთეს. მათი საუბრის თემები იყო საქართველოში ინფორმაციის თავისუფლება, ბოლო წლებში განხორციელებული ცვლილებები, გამჭვირვალე და დახურული საჯარო უწყებები და პრობლემები, მიღწევები და მთავარი გამოწვევები ინფორმაციის თავისუფლების კუთხით.

ნინო მერებაშვილმა აღნიშნა, რომ 2012 წლის საპარლამენტო არჩევნების შემდგომ, ახალი მთავრობა გაცილებით ღია იყო, ვიდრე ახლა, რაც მნიშვნელოვანწილად დაკავშირებულია იმასთან, რომ თავდაპირველად მათ წინა მთავრობის აქტივობებზე უწევდათ ინფორმაციის გაცემა.

თათული თოდუამ ყურადღება ინფორმაციის თავისუფლების ხარისხის გაუმჯობესებაში სახალხო დამცველის აპარატის მიერ შეტანილ წვლილზე და დაბრკოლებებზე ისაუბრა. მან აღნიშნა, რომ საქართველოში არსებული ნორმატიული რეალობა განსხვავდება პრაქტიკისგან, ხოლო მოქალაქეთა ჩართულობა და აქტივობა არ არის საკმარისად მაღალი იმისთვის, რომ სახელმწიფო უწყებებმა იგრძნონ ვალდებულება დადგენილი წესების მიხედვით გასცენ საჯარო ინფორმაცია. ამ საკითხში მას სალომე ცეცხლაძეც დაეთანხმა, რომელმაც თავისი ჟურნალისტური პრაქტიკიდან ინფორმაციის თავისუფლების შეზღუდვის არაერთი შემთხვევა გაიხსენა. მისი თქმით, ინფორმაციის გამოთხოვისას, საჯარო უწყებები კერძო პირებს ხშირად არ უბრუნებენ პასუხს, როდესაც ორგანიზაციებს შედარებით ამომწურავად პასუხობენ.

ლექციაზე დამსწრე სტუდენტებმა თემასთან დაკავშირებით არაერთი კითხვა დასვეს და დამსწრეებს საკუთარი მოსაზრებებიც გაუზიარეს.

როგორც საჯარო ლექციის მონაწილეებს, ასევე უნივერსიტეტში მყოფ სტუდენტებს დაურიგდათ ორგანიზაციის მიერ მომზადებული და გამოცემული ელ. ჩართულობის სახელმძღვანელოები, კვლევები და საინფორმაციო ბუკლეტები.

ინფორმაციის თავისუფლების დღე მსოფლიოში 2002 წლიდან აღინიშნება, ხოლო IDFI საქართველოში ინფორმაციის თავისუფლების ხარისხის გაუმჯობესებაზე 2009 წლიდან ზრუნავს.

იხილეთ ფოტო ალბომი