13 მაისს ჩატარდა საქართველოს ღია პარლამენტის სამუშაო ჯგუფის მონაწილე არასამთავრობო და საერთაშორისო ორგანიზაციების წარმომადგენლების შეხვედრა საპარლამენტო ღიაობასთან დაკავშირებით. შეხვედრა გაიმართა „საერთაშორისო გამჭვირვალობა-საქართველოსა“ და „ინფორმაციის თავისუფლების განვითარების ინსტიტუტის“ (IDFI) საერთო ინიციატივით „ღია მმართველობის პარტნიორობის“ ინიციატივაში საქართველოს პარლამენტის ჩართულობის მხარდაჭერის“ პროექტის ფარგლებში. აღნიშნულ პროექტს ახორციელებს ინფორმაციის თავისუფლების განვითარების ინსტიტუტი (IDFI) საქართველოს პარლამენტთან პარტნიორობით ევროკავშირისა (EU) და გაეროს განვითარების პროგრამის (UNDP) ერთობლივი პროექტის „საპარლამენტო დემოკრატიის სისტემის გაძლიერება საქართველოში“ ფარგლებში.

შეხვედრას უძღვებოდა „საერთაშორისო გამჭვირვალობა-საქართველოს“ წარმომადგენელი გიორგი თოფურია. შეხვედრაზე განხილული ძირითადი თემები იყო საპარლამენტო ღიაობის კულტურა, ინფორმაციის თავისუფლების რეგულირება, საპარლამენტო საქმიანობის შესახებ ინფორმაციაზე ხელმისაწვდომობის გამარტივება. არასამთავრობო და საერთაშორისო ორგანიზაციების წარმომადგენლებმა ერთმანეთს გაუზიარეს აღნიშნულ საკითხებთან დაკავშირებით გამოცდილება და ზემოთ ხსენებული პრობლემების სავარაუდო გადაჭრის გზების შესახებ რეკომენდაციები. 

საპარლამენტო ღიობასთან დაკავშირებით სტუმრებმა გააჟღერეს შემდეგი ინიციატივები: საპარლამენტო სესიების ავტორიზაცია, ინფორმაციის დროული მოწოდების აუცილებლობა, სამართლებრივი წყაროებისა და მრავალფეროვანი ინფორმაციის უზრუნველყოფა და ა.შ. ინფორმაციის თავისუფლებასთან დაკავშირებით ხაზი გაუსვეს არასამთავრობო სექტორის ჩართულობის აუცილებლობას, შეტყობინებების გაგზავნას ელექტრონული ფოსტის მეშვეობით და საძიებო სისტემის ხელმისაწვდომობას.

შეხვედრაზე მონაწილეებმა განიხილეს პარლამენტის ვებ-გვერდის და საპარლამენტო დოკუმენტაციის ეთნიკურ უმცირესობათა წარმომადგენლებისათვის ხელმისაწვდომობის საკითხი. შეხვედრის მონაწილეებმა აღნიშნეს, რომ ეთნიკური უმცირესობებისათვის ინფორმაციის მათთვის გასაგებ ენაზე მიწოდება პირველი ნაბიჯია მათი საპარლამენტო საქმიანობაში ჩართულობის გაზრდისაკენ.

შეხვედრის დასასრულს მონაწილეები შეთანხმდნენ, რომ გააგრძელონ თანამშრომლობა საპარლამენტოს ღიაობის მხარდაჭერის კუთხით და შესთავაზონ ღია პარლამენტის სამუშაო ჯგუფს კონკრეტული რეკომენდაციები ,,საქართველოს პარლამენტის სამოქმედო გეგმაში ღია პარლამენტისთვის” გასათვალისწინებლად.