ინოვაციებისა და ტექნოლოგიების სააგენტომ, 14 აგვისტოს განცხადებით, საქართველოში საყოველთაო მაღალსიჩქარიანი ინტერნეტის ინფრასტრუქტურის განვითარების დაწყება დააანონსა. იმის შესახებ, რომ საყოველთაო ინტერნეტიზაციის პროცესი - იმ ფორმით, როგორც ის დაიწყო - კერძო თუ არასამთავრობო სექტორს კითხვებს უჩენს, 9 სექტემბერს გამოქვეყნდა სტატია რადიო თავისუფლების მიერ. 

საყოველთაო ინტერნეტიზაციის პროექტში მიმდინარე პროცესები შეაფასა ინფორმაციის თავისუფლების განვითარების ინსტიტუტის (IDFI) მედია ექსპერტმა, უჩა სეთურმა და IDFI-ის გამგეობის თავმჯდომარემ, ლევან ავალიშვილმა. 

უჩა სეთურის განმარტებით, საყოველთაო ინტერნეტიზაციის კონკურსი იმიტომ ჩაიშალა, რომ პოტენციურმა ინვესტორმა არ იცოდა, რატომ და რა სამუშაოებში უნდა დაეხარჯა ფული. მისი თქმით, საქართველო ინტერნეტიზაციის ლიტვურ მოდელს ემხრობა, რაც არ არის საუკეთესო არჩევანი, ვინაიდან აღნიშნული მოდელი არ ითვალისწინებს ინტერნეტის მომხმარებლის ფაქტორს, კერძოდ, კომპიუტერის და ინტერნეტის გამოყენების ცოდნა-უნარს. 

"საჭიროა, რომ მოქალაქე მიერთებული იყოს ინტერნეტთან: რაღაც მონაცემები გაცვალოს, იმეილები მიიღოს, ინფორმაცია მოძებნოს და გაავრცელოს. ერთი სიტყვით, იყოს აქტიური. იგივე, სოფლის მეურნეობის პროდუქტების წარმოების ნაწილში, მათი რეალიზაციის ნაწილში, თავისი ბაზრის პოვნის ნაწილში" - ვკითხულობთ სტატიაში.

IDFI-ის გამგეობის თავმჯდომარის, ლევან ავალიშვილის განცხადებით, ასეთი სერიოზული პროექტი, რომელიც არა მხოლოდ საკომუნიკაციო ბიზნესთან, არამედ ეკონომიკის სხვა დარგების განვითარებასთანაც არის დაკავშირებული და სოციალურ-პოლიტიკური ცხოვრების მნიშვნელოვან საკითხებს მოიცავს, მაქსიმალური ჩართულობის პირობებში უნდა ხორციელდებოდეს. მისი თქმით, აუცილებელია ყველა დონეზე ეს პროცესი იყოს საჯარო, მაქსიმალური კონსულტირების პირობებში. 

"არ უნდა მოხდეს ისე, სხვა მთავრობა რომ მოვიდეს ან პოლიტიკა შეიცვალოს, [ინტერნეტიზაციის] დაწყებული პროცესი შეფერხდეს, გადასხვაფერდეს"- ამბობს, ლევან ავალიშვილი.