ინფორმაციის თავისუფლების გზამკვლევი წარმოადგენს სპეციალურ სახელმძღვანელო დოკუმენტს საჯარო დაწესებულებებისთვის. ნაშრომი ეფუძნება ინსტიტუტის საჯარო ინფორმაციის გამოთხოვის პრაქტიკულ მაგალითებს და მოიცავს ფაქტობრივად საქართველოს მთელს საჯარო სივრცეს. კონკრეტულ მაგალითებზე დაყრდნობით ნაშრომი რეალურად ასახავს საქართველოში არსებულ ვითარებას და სრულ წარმოდგენას უქმნის მკითხველს საჯარო ინფორმაციის ხელმისაწვდომობის არსებულ პრაქტიკასთან დაკავშირებით. 

ინფორმაციის თავისუფლება - გზამკვლევი საჯარო დაწესებულებებისთვის არის IDFI-ის მიერ მომზადებული რიგით მეორე სახელმძღვანელო დოკუმენტი, რომელიც პირველი გზამკვლევისგან განსხვავებით დამატებით მოიცავს ისეთ საკითხებს, როგორიცაა პერსონალურ მონაცემთა დაცვა და ინფორმაციის პროაქტიული გამოქვეყნება. 

გზამკვლევში დეტალურადაა განხილული ინფორმაციის თავისუფლებასთან დაკავშირებული საკითხები, განმარტებულია საჯარო ინფორმაციის არსი და მოქალაქეების უფლებები საჯარო ინფორმაციის გამოთხოვასთან დაკავშირებით. ნაშრომში მარტივი, გასაგები ენითაა გადმოცემული და განმარტებული ინფორმაციის ხელმისაწვდომობის მარეგულირებელი საკანონმდებლო ნორმები. მათ გაგებას მკითხველს არსებული პრაქტიკიდან მოყვანილი მაგალითები უადვილებს.

გზამკვლევის მიზანია, დაინტერესებულ პირებს მისცეს სათანადო თეორიული ცოდნა, დაეხმაროს საჯარო ინფორმაციის ხელმისაწვდომობასთან დაკავშირებული სამართლებრივი აქტების მართებულ გაგებასა და გამოყენებაში. ვფიქრობთ, გზამკვლევი სასარგებლო იქნება, როგორც ამ სფეროში მოღვაწე სპეციალისტებისთვის, ასევე ზოგადად მკითხველთა ფართო წრისთვისაც.

გზამკვლევი შემუშავდა "ინფორმაციის თავისუფლების განვითარების ინსტიტუტის" (IDFI) მიერ შეერთებული შტატების საერთაშორისო განვითარების სააგენტოს USAID- ის პროგრამის „დემოკრატიული მმართველობა საქართველოში (G-3)“ ფარგლებში. ნაშრომის ავტორებს წარმოადგენენ პაატა ტურავა, ლევან ავალიშვილი და სერგი ჯორბენაძე. რედაქტორი - გიორგი კლდიაშვილი.

გადმოიწერეთ გზამკვლევი ქართულ, ინგლისურ, სომხურ  და აზერბაიჯანულ ენებზე. 

/public/upload/courts/EBRD/Freedom of Information Guidebook Second Edition.pdf