ფაქტობრივი გარემოებები: მოსარჩელეს წარმოადგენდა გაზეთი Timpul Info-Magazine, რომელმაც გამოაქვეყნა სტატია სათაურით ,,ფუფუნება სიღარიბის მიწაზე“, რომელიც შეეხებოდა სახელმწიფოსა და კერძო კომპანიას შორის არსებულ ურთიერთობას, კერძოდ სახელმწიფოს მიერ კერძო კომპანიის მეშვეობით ძვირადღირებული მანქანების შესყიდვას საზოგადოებისათვის ინფორმაციის მიწოდების გარეშე. სტატიის მიხედვით, სახელმწიფოს მიერ კერძო კომპანიის მეშვეობით შესყიდული იქნა 42 ძვირადღირებული მანქანა, რომელთა საერთო ღირებულებამ 1 მილიონ ევროს გადააჭარბა. სტატიის მიხედვით, ხელისუფლებას არ წარმოუდგენია დასაბუთება ძვირადღირებული მანქანების შესყიდვის აუცილებლობის თაობაზე. სტატიაში მოცემული იყო ხელისუფლების მაღალ წრეებში კორუფციის არსებობის შესახებ ბრალდება, რომელიც ჟურნალისტის აზრით მოითხოვდა სათანადო შესწავლას.

კერძო კომპანიამ, რომელმაც სახელმწიფოს თანხით განახორციელა შესყიდვები წარადგინა საჩივარი გაზეთის წინააღმდეგ, მისი ნებართვის გარეშე, მის მიერ განხორციელებული შესყიდვების შესახებ ინფორმაციის გამოქვეყნების გამო და მოითხოვა ზიანის ანაზღაურება. ეროვნული სასამართლოს გადაწყვეტილებით მოსარჩელე გაზეთს ჩამოერთვა ქონება და მისი საბანკო ანგარიში დაყადაღდა.

გაზეთმა წარადგინა საჩივარი ადამიანის უფლებათა ევროპულ სასამართლოში კონვენციის მე-10 მუხლით გარანტირებული გამოხატვის თავისუფლების ჩარევის საფუძვლით.

სასამართლოს დასაბუთება: სასამართლომ არაპირდაპირ დაადგინა საჯარო დაწესებულებაში დაცულ ოფიციალურ დოკუმენტებზე ხელმისაწვდომობის უფლება და აღნიშნა, რომ სახელმწიფომ უნდა წარმოადგინოს ინფორმაციის ხელმისაწვდომობის შემზღუდველი ნებისმიერი ღონისძიების საფუძვლიანი დასაბუთება, რომლის მიღების უფლება საზოგადოებას გააჩნია.

სასამართლომ არ გაიზიარა სახელმწიფოს არგუმენტი, რომ გაზეთი მიზნად ისახავდა კერძო კომპანიის რეპუტაციის შელახვას და ბაზარზე არსებული კონკურენციის წესებზე ზეგავლენის მოხდენას. სასამართლომ მიიჩნია, რომ სტატია მიზნად ისახავდა მთავრობის კრიტიკას სახელმწიფო ბიუჯეტიდან თანხის არამიზნობრივი და გაუმჭვირვალე ხარჯვის გამო, რომელის მიმართ საზოგადოებას გააჩნდა დიდი ინტერესი. სასამართლომ განმარტა, რომ კერძო კომპანიები, რომლებიც სახელმწიფოსთან დადებული ხელშეკრულებების საფუძველზე განკარგავენ სახელმწიფო ფინანსებს უნდა დაექვემდებარონ საზოგადოების მხრიდან მკაცრ ზედამხედველობას აღნიშნული საკითხის მიმართ მაღალი საჯარო ინტერესის გამო და მიიღონ კრიტიკა აღნიშნულ საკითხთან დაკავშირებით. სასამართლომ ხაზი გაუსვა მედიის, როგორც სოციალური მეთვალყურის როლს, საზოგადოებისათვის მაღალი საჯარო ინტერესის მქონე ინფორმაციის მიწოდების მიზნით და აღნიშნა, რომ გაზეთისათვის ამ ტიპის ჯარიმის დაწესებას გააჩნდა შემზღუდველი ეფექტი, რაც უარყოფითად იმოქმედებდა გაზეთის მიერ საჯარო მნიშვნელობის საკითხთან დაკავშირებით დისკუსიის გამართვაზე მომავალში.

სასამართლომ დაადგინა ადამიანის უფლებათა ევროპული კონვენციის მე-10 მუხლის დარღვევა.

ადამიანის უფლებათა ევროპულმა სასამართლოს 2007 წლის 27 იანვრის გადაწყვეტილება, საქმეზე Timpul Info-Magazine and Anghel v Moldova.

/public/upload/salome/CASE OF TIMPUL INFOMAGAZIN AND ANGHEL v MOLDOVA.pdf

მომზადდა ღია საზოგადოების ფონდის (OSF) ადამიანის უფლებათა სტაჟირების 2013 წლის გრანტის ფარგლებში.