23 დეკემბერს ინფორმაციის თავისუფლების განვითარების ინსტიტუტმა (IDFI)  სტუდენტებისთვის ანტიკორუფციული ფილმების ჩვენება გამართა. ღონისძიების ფარგლებში წარმოდგენილი იყო კორუფციის წინააღმდეგ გაეროს კონვენციის კოალიციის (UNCAC Coalition) ორგანიზებით გამართულ საერთაშორისო კონკურსში მონაწილე/გამარჯვებული მოკლე ფილმები:

1. “18 Plaintiffs” - წარმოადგენს დოკუმენტურ ფილმს, რომელიც მოგვითხრობს ისტორიას ინდონეზიაში COVID-19-თან დაკავშირებული სამთავრობო სოციალური დახმარების პროგრამაში არსებული კორუფციის 18 მსხვერპლზე. ფილმი ცხადყოფს, რომ კორუფციის წინააღმდეგ ბრძოლა უბრალო მოქალაქეებისთვისაც შესაძლებელია ერთიანი ძალისხმევით.  

2. “Skyscraper” - ცათამბჯენი ქართული 5-წუთიანი ანიმაციაა, რომელიც ეხება კორუფციულ სქემას და ასახავს როგორც კორუფციის ნეგატიურ შედეგებს, ისე მის გრძელვადიან გავლენას მთლიანად საზოგადოებაზე. 

3. “Citizens finance harmful private businesses” - გადმოგვცემს რეალურ ისტორიას თუ როგორ იქცა მოქალაქეების ხარჯზე ბოსნიასა და ჰერცოგოვინაში „სუფთა ელექტროენერგიის“ წარმოების ქარხნები, რომლებიც თავდაპირველად ამოწურვადი ბუნებრივი რესურსების შესანარჩუნებლად იყო ჩაფიქრებული, მარტივ შემოსავლის წყაროდ კერძო პირებისთვის.

4. “Corruption Files: The Whistleblower: Anna Garrido” – მოგვითხრობს მხილების მნიშვნელობაზე და გადმოგვცემს მამხილებლის ისტორიას რეალური პიროვნების მაგალითზე. 

მოკლე ფილმების ჩვენების შემდეგ კორუფციის წინააღმდეგ ბრძოლის მიმართულებით რელევანტურ საკითხებზე გაიმართა დისკუსია, რომელშიც მონაწილეობა მიიღეს თბილისის სახელმწიფო უნივერსიტეტის, ილიას სახელმწიფო უნივერსიტეტის, შავი ზღვის საერთაშორისო უნივერსიტეტისა და საქართველოს ტექნიკური უნივერსიტეტის სტუდენტებმა.

ღონისძიების ფარგლებში IDFI-ის ანტიკორუფციული მიმართულების ხელმძღვანელმა, მარიამ მაისურაძემ ასევე მიმოიხილა მხილების ინსტიტუტი და ისაუბრა ამ მიმართულებით საქართველოში არსებულ საკანონმდებლო და პრაქტიკულ გამოწვევებზე. 

ღონისძიება გაიმართა შვედეთის საერთაშორისო განვითარების თანამშრომლობის სააგენტოს (Sida) მხარდაჭერით.