აჭარის უმაღლესმა საბჭომ ღია მმართველობის 2020-2021 წლების სამოქმედო გეგმით აიღო სხვადასხვა ვალდებულება, იმისათვის, რომ უფრო ხელმისაწვდომი და ინკლუზიური გამხდარიყო უმაღლესი საბჭოს საქმიანობა 2021 წლის ბოლომდე. დასახელებული სამოქმედო გეგმის მე-6 ვალდებულება ითვალისწინებდა უმაღლესი საბჭოს ვებგვერდის ადაპტირებას შეზღუდული შესაძლებლობების მქონე პირთათვის.

ინფორმაციის თავისუფლების განვითარების ინსტიტუტმა (IDFI) ყველაზე ავტორიტეტული გლობალური სახელმძღვანელო პრინციპების, Web Content Accessibility Guidelines (WCAG) 2.1-ზე დაყრდნობით მოამზადა უმაღლესი საბჭოს ვებგვერდის მისაწვდომობის კონცეფცია, რომელიც გაიზიარა აჭარის უმაღლესმა საბჭომაც.

აღნიშნული კონცეფციის შესაბამისად,  და პროექტის „საპარლამენტო დემოკრატიის კონსოლიდაცია საქართველოში“ ფარგლებში, რომელიც ხორციელდება ევროკავშირისა (EU) და გაეროს განვითარების პროგრამის (UNDP) მხარდაჭერით, ინფორმაციის თავისუფლების განვითარების ინსტიტუტის (IDFI) ხელშეწყობით ადაპტირდა უმაღლესი საბჭოს ვებგვერდი sca.ge. ადაპტირებულ ვებგვერდზე შესაძლებელია ტექსტისა და ფონის, ფერის, ფონტის შეცვლა სპეციალური წამკითხველი პროგრამით, რომლის საინსტალაციო ფაილი განთავსებულია ვებგვერდზე; შესაძლებელია ტექსტის წაკითხვა; ვებგვერდი ასევე იძლევა საშუალებას, რომ საინფორმაციო მასალები განთავსდეს სინქრონიზებული სუბტიტრებით.

უმაღლესი საბჭოს ვებგვერდის ადაპტირება ხელს შეუწყობს უმაღლეს საბჭოს, გაზარდოს ვებგვერდის შინაარსის თანაბარი ხელმისაწვდომობა და უზრუნველყოს მოქალაქეთა ინკლუზიური ჩართულობა, რაც, თავის მხრივ, გაზრდის უმაღლესი საბჭოს გამჭვირვალობასა და ღიაობას და დადებით ზეგავლენას მოახდენს მოქალაქეთა ჩართულობაზე აჭარის უმაღლესი საბჭოს მიერ გადაწყვეტილებების მიღების პროცესში.