2017 წლის 1 ივნისს, IDFI შეუერთდა „გაეროს კორუფციის წინააღდეგ კონვენციის (UNCAC) კოალიციას“, რომელიც მსოფლიო მასშტაბით 350-ზე მეტ სამოქალაქო საზოგადოების ორგანიზაციას მოიცავს 100-ზე მეტ ქვეყანაში, და მიზნად ისახავს UNCAC-ის რატიფიკაციას, იმპლემენტაციასა და მონიტორინგს. კოალიცია 2006 წლის აგვისტოში დაფუძნდა და მოიცავს საერთაშორისო, რეგიონულ და ეროვნულ სამუშაო ჯგუფებს, რომლებიც მუშაობენ ადამიანის უფლებების, შრომითი უფლებების, მმართველობის, ეკონომიკური განვითარების, გარემოს და კერძო სექტორის ანგარიშვალდებულების სფეროებში.

კოალიციის წევრები არიან: AccessInfoEurope, AfriCOG, Basel Institute on Governance, BRAC University Institute of Governance, Christian Aid, Commonwealth Human Rights Initiative, GAATW, Global Witness, Institute for Security Studies in Africa, PSI Link, Tax Justice Network, Tearfund, Transparency International, UNICORN და მრავალი სხვა. ერთ-ერთი დამფუძნებელი ორგანიზაცია - „საერთაშორისო გამჭვირვალობა“ კოალიციის სამდივნოს ფუნქციას ასრულებს. 

კოალიცია კოორდინაციას უწვეს ერთობლივ ქმედებებს და საერთო პოზიციით გამოდის UNCAC-თან დაკავშირებულ საკითხებზე, ხელს უწყობს წევრებს შორის ინფორმაციის გაცვლას, მხარს უჭერს სამოქალაქო საზოგადოებების მცდელობებს, ეროვნულ დონეზე დაუჭირონ მხარი UNCAC-ს.

2006-2009 წლებში კოალიციის კამპანიის მიზანი იყო UNCAC-ისთვის ეფექტური, თანამონაწილეობითი და გამჭირვალე მონიტორინგის მექანიზმის შექმნა. ამ მიზნის მისაღწევად, მნიშვნელოვანი სამთავრობოთაშორისო შეხვედრების წინ კოალიციის წევრები აწყობდნენ ადვოკატირების საერთო კამპანიებს. ეს ფაზა დასრულდა 2009 წელს UNCAC-ის შემოწმების მექანიზმის მიღებით, რომელიც ძალაში 2010 წლის ივლისში შევიდა.

ამჟამად კოალიცია ცდილობს ხელი შეუწყოს შემოწმების პროცესში სამოქალაქო საზოგადოების ჯგუფების მონაწილეობას და მათ მიერ კვალიფიცირებული წინადადებების შეტანას. კოალიცია ასევე ცდილობს, მოიპოვოს მთავრობების თანხმობა, გასაჯაროვდეს შემოწმების შედეგად დადებული ანგარიშები.

კოალიცია ასევე აწესებს ადვოკატირების სამიზნეებს UNCAC-თან დაკავშირებულ საკითხებზე, როგორიცაა ინფორმაციაზე წვდომა, ქონების დაბრუნება, მამხილებელთა დაცვა, და ანტიკორუფციული საქმიანობა.

განსაკუთრებული ყურადღება ეთმობა UNCAC წევრ სახელწმიფოთა კონფერენციას (CoSP). კოალიციის წევრები დამკვირვებლის სტატუსით ესწრებიან ამ სამთავრობოთაშორისო შეხვედრას. ისინი შეხვედრებს მართავენ მთავრობის წარმომადგენლებთან, აქვეყნებენ გაცხადებებს, გამოსცემენ საინფორმაციო ბიულეტენს, წერენ ბლოგებსა და პრესრელიზებს, ატარებენ პრესკონფერენციებს და სხვა.