კორუფციასთან ბრძოლის სასერტიფიკატო პროგრამის სამაგისტრო კურსი დაიწყო

სიახლეები | კორუფციასთან ბრძოლა | სტატია 30 სექტემბერი 2020

2020 წლის 30 სექტემბერს გაიმართა პირველი ლექცია კორუფციასთან ბრძოლის სასერტიფიკატო პროგრამის ფარგლებში შექმნილ სამაგისტრო საგანში „ანტიკორუფციული პოლიტიკის მართვა საჯარო და კერძო დაწესებულებებში“.

 

უკვე მეორე წელია, რაც კორუფციასთან ბრძოლის სასერტიფიკატო პროგრამა მიმდინარეობს, რომელიც წარმატებული სტარტის შემდეგ ტრანსფორმირდა, და პირველ წელს არსებული 8 პროფესიული მოდულის ნაცვლად, ილიას უნივერსიტეტის მეცნიერებათა და ხელოვნების ფაკულტეტის საბაკალავრო და სამაგისტრო პროგრამების ბაზაზე, შეიქმნა 4 აკადემიური კურსი. აღნიშნულ აკადემიურ კურსებს გაივლიან ილიას უნივერსიტეტის სტუდენტები და კონკურსის შედეგად შერჩეული სხვა უნივერსიტეტების მაგისტრანტები, სახელმწიფო, ბიზნეს და არასამთავრობო სექტორის წარმომადგენლები. აღსანიშნავია, რომ ილიას უნივერსიტეტის სტუდენტებს შესაბამისი მოსწრების შემთხვევაში შესაძლებლობა ექნებათ მიიღონ აკადემიური კრედიტები და სერტიფიკატები, ხოლო კონკურსის შედეგად შერჩეული კანდიდატები, პროგრამის წარმატებით დასრულების შემთხვევაში, მიიღებენ სერტიფიკატებს. კორუფციასთან ბრძოლის საბაკალავრო კურსები 28 სექტემბერს დაიწყო საგნით „კარგი მმართველობა და კორუფცია“ და სამაგისტრო კურსების პარალელურად განხორციელდება.

 

საგანს „ანტიკორუფციული პოლიტიკის მართვა საჯარო და კერძო დაწესებულებებში“ კითხულობს საერთაშორისო ორგანიზაციების კონსულტანტი - თინათინ ხიდაშელი. ლექციის პირველ დღეს, კურსის მონაწილეებს მიმართა ინფორმაციის თავისუფლების განვითარების ინსტიტუტის (IDFI) აღმასრულებელმა დირექტორმა, გიორგი კლდიაშვილმა. გიორგიმ ხაზი გაუსვა საქართველოში კორუფციასთან ბრძოლის მნიშვნელობას, ისაუბრა კორუფციის დამანგრეველ ეფექტზე და აღნიშნა, რომ განსაკუთრებით მნიშვნელოვანი არის საზოგადოების ცნობიერების ზრდა კორუფციის და მისი ნებისმიერი შესაძლო გამოვლინების მიმართ.

 

კურსის მონაწილეები საგანში „ანტიკორუფციული პოლიტიკის მართვა საჯარო და კერძო დაწესებულებებში“, სხვა საკითხებთან ერთად, შეისწავლიან ისეთ თემებს, როგორიცაა: ანტიკორუფციული პოლიტიკის საერთაშორისო ჩარჩო; ეთიკის სტანდარტები და ინტერესთა შეუთავსებლობისა და კორუფციის პრევენცია საჯარო სექტორში; კორუფციის რისკების მართვა, ფინანსური კონტროლის მექანიზმები, საჩუქრები და მასპინძლობის დანახარჯები, საქველმოქმედო შენატანები/სპონსორობა; კორუფციის რისკების მართვა ანგარიშვალდებულ საწარმოებში; კორუფციის რისკების მართვა სახელმწიფო საწარმოებში; ფულის გათეთრებისა და ტერორიზმის დაფინანსების წინააღმდეგ ბრძოლა საჯარო, კერძო და არაკომერციულ იურიდიულ პირებში (FATF-ის რეკომენდაციები); მხილების არსი და მნიშვნელობა; მხილების ფარგლები; ბალანსი საჯარო მოსამსახურის გამოხატვის თავისუფლებასა და სახელმწიფოსადმი ერთგულების ვალდებულებას შორის; მამხილებლის და მასთან გათანაბრებული პირის დაცვის გარანტიები; განსხვავება მხილებასა და ინფორმაციის გაჟონვას შორის; მამხილებლის ანონიმურობის დაცვა; კონფიდენციალური ინფორმაციის გამხელა; ჟურნალისტური წყაროს კონფიდენციალურობა; ჟურნალისტური ეთიკის წესები; მედია ორგანიზაციაში ჩხრეკის შეზღუდვა.  

 

ილიას უნივერსიტეტის სტუდენტებთან ერთად, საგანში „ანტიკორუფციული პოლიტიკის მართვა საჯარო და კერძო დაწესებულებებში“ ჩართულია კონკურსის საფუძველზე შერჩეული 24 მონაწილე. სულ, კორუფციასთან ბრძოლის სასერტიფიკატო პროგრამაში, კონკურსის საფუძველზე შეირჩა 44 მონაწილე. ამათგან, 20 მონაწილე ჩართულია კორუფციასთან ბრძოლის სასერტიფიკატო პროგრამის საბაკალავრო საგნებში.

 

კორუფციასთან ბრძოლის პროგრამის ფინანსური მხარდამჭერია ღია საზოგადოების ინსტიტუტის ბუდაპეშტის ფონდი (OSI) და ხორციელდება ღია საზოგადოების ფონდის (OSGF) თანადაფინანსებით.

 

 

სხვა მასალები ამ თემაზე
სიახლეები

კორუფციასთან ბრძოლის სასერტიფიკატო პროგრამის მონაწილეთა დაჯილდოების ცერემონია

04.12.2023

IDFI-მ აკაკი ჩხენკელის სახელობის ხონის მეორე საჯარო სკოლაში მოსწავლეებთან შეხვედრა გამართა

01.12.2023

მუნიციპალიტეტების წარმომადგენლობითი ხარჯები

27.11.2023

ეროვნული კანონმდებლობა, კონვენცია და საჯარო ინფორმაციის უფლება: პრაქტიკული რჩევები შედეგიანობის გასაზრდელად

24.11.2023
განცხადებები

„კოალიცია ინფორმაციის სანდოობისთვის“ საქართველოსთვის კანდიდატის სტატუსის მინიჭების რეკომენდაციასა და დეზინფორმაციის მიმართულებით ახალ დათქმას ეხმაურება

10.11.2023

ქართული არასამთავრობო ორგანიზაციების მიმართვა ევროკომისიას

02.11.2023

ხელისუფლება მოსამართლეებისა და ყოფილი პროკურორის სანქცირებაზე არ რეაგირებს

30.10.2023

ვეხმიანებით იუსტიციის უმაღლესი საბჭოს არამოსამართლე წევრის, ლევან ნემსაძის კენჭისყრის პროცესს

18.10.2023
ბლოგპოსტები

რუსეთის მოქალაქეების შემოდინება საქართველოში და საზოგადოებრივი უსაფრთხოების გამოწვევები

05.10.2023

ენერგეტიკული სიღარიბე და დანაშაული საქართველოში

05.10.2023

საქართველოს შრომის ბაზარზე ახალგაზრდების უმუშევრობის დონე

05.10.2023

საჯარო ინფორმაციის ხელმისაწვდომობის უფლების აღიარება: კონვენციის განვითარების პროცესი და ძირითადი პრეცედენტები

29.09.2023