ელექტრონული კომუნიკაციების ბაზრის ორი უმსხვილესი პროვაიდერის - „კაუკასუს ონლაინის“ და „სილკნეტის“ - შერწყმის თაობაზე თანხმობის გასაცემად კომუნიკაციების ეროვნულმა კომისიამ საჯარო ადმინისტრაციული წარმოება დაიწყო.

აღნიშნული ფაქტის შესახებ ექსპერტებმა თავიანთი აზრი გამოთქვეს. მათ შორის, ინფორმაციის თავისუფლების განვითარების ინსტიტუტის (IDFI) მედია ექსპერტმა, უჩა სეთურმაც დააფიქსირა თავისი და ორგანიზაციის დამოკიდებულება მოსალოდნელი ცვლილებების შესახებ.

„კაუკასუს ონლაინისა“ და „სილკნეტის“ სავარაუდო გაერთიანების შესახებ ინფორმაცია აქტიურად გააშუქეს მედიასაშუალებებმა: საზოგადოებრივი მაუწყებელი, მაესტრო, radiotavisufleba.ge, netgazeti.ge.

საზოგადოებრივი მაუწყებლის სიუჟეტში IDFI-ის ექსპერტი, უჩა სეთური აღნიშნავს, რომ ცვლილებების განხორციელების შემთხვევაში, სახელმწიფოს მხრიდან დამატებითი რესურსების შექმნა გახდება საჭირო, დიდი მონოპოლისტის რეგულაციისთვის.

მაესტროს სიუჟეტში უჩა სეთური განმარტავს, რომ ამ ორი პროვაიდერის გაერთიანების შემთხვევაში, ბაზარზე მსხვილი მონოპოლისტი გაჩნდება, რის შედეგადაც მომხმარებლის არჩევანი ხარისხსა და ფასზე შეიზღუდება.

Radiotavisufleba.ge-ს სტატიაში ვკითხულობთ: „მოსალოდნელი ცვლილება უარყოფითად იმოქმედებს ინვესტიციების შემოსვლაზე ჩვენს ბაზარზე. მონოპოლიის შემთხვევაში ჩვენი ბაზარი უცხოელი ინვესტორებისთვის ნაკლებად საინტერესო იქნება და გარდა ამისა, პრობლემა შეიძლება შეიქმნას მომსახურების ხარისხსა და ფასთან დაკავშირებითაც“.

Netgazeti.ge-ის სტატიაში IDFI-ის მედიაექსპერტის, უჩა სეთურის შეხედულება, ბაზარზე მსხვილი მონოპოლისტის გამოჩენასთან დაკავშირებით, ვრცლად არის წარმოდგენილი. მისი თქმით, „კაუკასუს ონლაინიცა“ და „სილკნეტიც“ მსხვილი მონოპოლისტები არიან და კომისიამ მათი გაერთიანება არ უნდა დაუშვას. პრობლემების შემთხვევაში, კომპანიების არა შეერთება, არამედ დაშლა უნდა მოხდეს ფუნქციურად ან სტრუქტურულად.