26 ოქტომბერს, ინფორმაციის ხელმისაწვდომობის საკითხებზე ქუთაისში სასტუმრო რჩეული პალასში რეგიონული მედიის წარმომადგენლებისათვის სემინარი გაიმართა.
ერთდღიანი სემინარი ორგანიზებული იყო ინფორმაციის თავისუფლების განვითარების ინსტიტუტის (IDFI)  მიერ ევროპის საბჭოს და ევროკავშირის ერთობლივი პროგრამის -„მასობრივი საინფორმაციო საშუალებების თავისუფლების, პროფესიონალიზმის და პლურალიზმის მხარდაჭერა სამხრეთ კავკასიასა და მოლდოვაში“ ფარგლებში.

სემინარში მონაწილეობა მიიღეს ბეჭდური და სატელევიზიო მედიის წარმომადგენლებმა ქუთისიდან, ზესტაფონიდან ბათუმიდან და ოზურგეთიდან.
სემინარი გახსნეს ევროპის საბჭოს წარმომადგენელმა ლეილა დერვიშიაჯიჩმა (მედიის განყოფილება) და ინფორმაციის თავისუფლების განვითრების დირექტორმა გიორგი კლდიაშვილმა.
შეხვედრა ორი სესიისაგან შედგებოდა. გიორგი კლდიაშვილმა ჟურნალისტებს ინფორმაციის თავისუფლების ისტორია, ინფორმაციის ხელმისაწვდომობასთან დაკავშირებულ საერთაშორისო კანონმდებლობა და თანამედროვე ტენდენციები გააცნო, ასევე დეტალურად ისაუბრა „პარტნიორობა ღია მმართველობის“ (Open Government Partnership) შესახებ და საქართველოს მონაწილეობის შესახებ ამ ინიციატივაში.
ინფორმაციის თავისუფლების ქართულ კანონმდებლობაზე, ადმინისტრაციულ ორგანოებში საჯარო ინფორმაციის ხელმისაწვდომობასა და სასამართლო პრაქტიკაზე სემინარის მონაწილეებს ლევან ავალიშვილი (IDFI-ის გამგეობის თავმჯდომარე და პროექტს „საჯარო ინფორმაციის მონაცემთა ბაზა- www.opendata.ge “ დირექტორი) ესაუბრა.

ლევან ავალიშვილმა რეგიონული მედიის წარმომადგენლებს   გააცნო საქართველოს ზოგად ადმინისტრაციულ კოდექსში (თავი III -ინფორმაციის თავისუფლება) შესული  ცვლილებები, ესაუბრა ინფორმაციის პროაქტიულ გამოქვეყნებისა  და ინფორმაციის ელექტრონული ხელმისაწვდომობის პრაქტიკის დანერგვის უპირატესობებზე.

ქართველ ჟურნალისტებს გამოცდილება გაუზიარა ასევე, სემინარის მოწვეულმა ექსპერტმა, ბულგარეთში არასამთავრობო ორგანიზაცია „ინფორმაციის ხელმისაწვდომობის პროგრამის“ (Access to Information Program) სამართლებრივი ჯგუფის ხელმძღვანელმა ალექსანდრე კაშუმოვმა. მან არსებული კანონმდებლობის და ბულგარელი ჟურნალისტების მიერ მისი გამოყენების შესახებ ესაუბრა.
ალექსანდრე კაშუმოვმა ასევე აჩვენა დოკუმენტური ფილმი, რომელშიც მოთხრობილი იყო 5 ისტორია ბულგარელი ჟურნალისტების მიერ წარმატებით განხორციელებული ჟურნალისტური გამოძიებების შესახებ.
სემინარის ბოლოს  გაიმართა დისკუსია. თავის მხრივ, საკუთარ გამოცდილებაზე ისაუბრეს ჟურნალისტებმაც, დაისვა შეკითხვები, გააკეთდა შეფასებები, განხილულ იქნა საჯარო დოკუმენტების ხელმისაწვდომობასთან დაკავშირებული პრაქტიკა და სამომავლო გამოწვევები.
ინფორმაციის თვისუფლების განვითარების ინსტიტუტმა სემინარი ჟურნალისტებისათვის ევროკავშირის და ევროსაბჭოს პროგრამის ფარგლებში მეორედ ჩაატარა.  პირველ სემინარში, რომელიც 2012 წლის 6 ივლისს სასტუმრო „ბეთსიში“ გაიმართა, ცენტრალური მედიის წარმომადგენლები მონაწილეობდნენ.