2016 წლის 5-6 მარტს, საქართველოს პარლამენტის ღია და გამჭვირვალე მმართველობის მუდმივმოქმედმა საბჭომ მიიღო კონცეფცია, რომლის მიზანია ხელი შეუწყოს საქართველოს ღია პარლამენტის სამოქმედო გეგმის 3.1. ვალდებულების განხორციელებას. ვალდებულება გულისხმობს პარლამენტის ვებგვერდზე დოკუმენტების ადვილად დასამუშავებელ ფორმატში განთავსებას.

ვალდებულების საბოლოო ამოცანაა, 2016 წლის ბოლოსთვის პარლამენტის ვებგვერდზე PDF (Portable Document Format) ფორმატში გამოქვეყნებული დოკუმენტაციის მინიმუმამდე დაყვანა - კანონპროექტების და მათთან დაკავშირებული დოკუმენტების, დადგენილებების, პროექტებისა და რეზოლუციების ადვილად დასამუშავებელ ფორმატში გამოქვეყნება. მიღებული კონცეფციის საფუძველზე შემუშავდება პარლამენტის რეგლამენტში შესატანი ცვლილებების პროექტი, რომელიც იქნება ზემოთ აღნიშნული ვალდებულების განხორციელების სამართლებრივი საფუძველი.

დღეის მდგომარეობით, პარლამენტის ვებგვერდზე ქვეყნდება საპარლამენტო დოკუმენტაციის მხოლოდ ნაწილი, ხოლო გასაჯაროებული დოკუმენტების უმეტესობა (მაგალითად, პარლამენტის დადგენილებები, რეზოლუციები, განცხადებები, მიმართვები, კანონპროექტები და მათთან დაკავშირებული დოკუმენტაცია) გამოქვეყნებულია PDF ფორმატში, რაც შეუძლებელს ხდის დოკუმენტში შემავალი მონაცემების დამუშავებასა და საძიებო სისტემებში მოძიებას.

აუცილებელია, პარლამენტის ვებგვერდზე დოკუმენტაციის როგორც ღია, ისე ადვილად დასამუშავებელ ფორმატში (მაგალითად, HTML/MS Word) გამოქვეყნება მათი შემდგომი გამოყენების მიზნით.

საქართველოს პარლამენტმა ღია პარლამენტის სამოქმედო გეგმა (2015-2016) 2015 წლის 17 ივლისს დაამტკიცა. სამოქმედო გეგმა, რომელიც შეიმუშავეს საქართველოს ინტერფრაქციულმა და სამოქალაქო საზოგადოების სამუშაო ჯგუფებმა, 18 ვალდებულებისგან შედგება და პასუხობს ღია მმართველობის პარტნიორობის (Open Government Partnership, OGP) ოთხ ძირითად პრინციპს: მოქალაქეთა ჩართულობა, ინფორმაციის ხელმისაწვდომობა, ანგარიშვალდებულება, ინოვაცია და ტექნოლოგიები.

საქართველოს პარლამენტს სამოქმედო გეგმის განხორციელებაში მხარს უჭერს პროექტი „საქართველოს პარლამენტის მხარდაჭერა ღია პარლამენტის სამოქმედო გეგმის განხორციელების პროცესში“, რომელსაც ახორციელებს IDFI გაეროს განვითარების პროგრამისა (UNDP) და ევროკავშირის (EU) ფინანსური მხარდაჭერით. IDFI აღნიშნული პროექტის ფარგლებში კოორდინირებას უწევს საპარლამენტო საბჭოსა და საკონსულტაციო ჯგუფის საქმიანობას.

/public/upload/Meri/Parliament Web.pdf