IDFI მიესალმება მთავრობის გადაწყვეტილებას ე.წ. „ქამრების შემოჭერასა“ და ადმინისტრაციული ხარჯების შემცირებასთან დაკავშირებით. რამდენადაც ცნობილი არაა, თუ როგორ აპირებს სახელმწიფო დაზოგილი თანხების გამოყენებას, ვვარაუდობთ, რომ აღნიშნული გადაწყვეტილების მიღებისკენ მთავრობას ქვემოთ ჩამოთვლილმა რისკ-ფაქტორებმა უბიძგა.

1. მთავრობის წარმომადგენლების განცხადებით, სახელმწიფოს ეკონომიკური ზრდის პროგნოზმა 5%-დან 2-2,5%_მდე დაიწია. შეიძლება ვივარაუდოთ, რომ მთავრობა ხედავს წლის ბოლოს ბიუჯეტის შესრულების საფრთხეს. შესაძლოა, დაზოგილი თანხით სახელმწიფო ბიუჯეტის სავარაუდო დეფიციტის თავიდან არიდებას გეგმავს.

2. ლარის დევალვაციის ფონზე, სახელმწიფო უშვებს გაზრდილი ინფლაციური რისკების ალბათობას. აქედან გამომდინარე, შეიძლება შეიქმნას ბიუჯეტით დაგეგმილი შესყიდვების განხორციელების პრობლემა.

3. ლარის დევალვაციის პირობებში, სახელმწიფოს შეიძლება მოუწიოს უცხოურ ვალუტაში დენომინირებული საგარეო ვალის მომსახურებისთვის მეტი თანხის მოძიება ეროვნულ ვალუტაში.

IDFI მრავალი წელია სახელმწიფოს მიერ ადმინისტრაციული ხარჯების განკარგვის პროცესის მონიტორინგითაა დაკავებული, იქნება ეს პრემია-დანამატები, ავტოპარკი, მივლინებები თუ სხვა.

ინსტიტუტი მზადაა, საკუთარ გამოცდილებაზე დაყრდნობით, მთავრობას შესთავაზოს სარეკომენდაციო სახის დოკუმენტის მომზადება, სადაც წარმოადგენს საკუთარ მოსაზრებებს, თუ როგორ უფრო ეფექტური იქნება ადმინისტრაციული ხარჯების შემცირება და ზემოთხსენებული რისკებისგან თავის დაზღვევა.