სახელმწიფო დონეზე ინფორმაციული უსაფრთხოების გაძლიერებასა და კიბერ კულტურის განვითარებაში წვლილის შეტანა ინფორმაციის თავისუფლების განვითარების ინსტიტუტის (IDFI) ერთ-ერთ პრიორიტეტულ მიმართულებას წარმოადგენს. სწორედ აღნიშნულის ფარგლებში, 2021 წლის 18 ნოემბერს ინსტიტუტმა კიბერუსაფრთხოების ეროვნულ ასოციაციასთან თანამშრომლობის მემორანდუმი გააფორმა. კიბერუსაფრთხოების ეროვნული ასოციაცია ქართული არასამთავრობო არაკომერციული ორგანიზაციაა, რომელიც საქართველოში კიბერუსაფრთხოების გაძლიერებისა და საკითხის ირგვლივ ცნობიერების ამაღლების მიმართულებით მნიშვნელოვან აქტივობებს ახორციელებს.
მემორანდუმის ფარგლებში ორგანიზაციები მიზნად ისახავენ მჭიდრო, ხანგრძლივი, ორმხრივი ინტერესების გათვალისწინებაზე დაფუძნებული პარტნიორული ურთიერთობების დამყარებას, რომელიც ხელს შეუწყობს კიბერუსაფრთხოებისა და კიბერ ინციდენტების მიმართ ინფორმაციული საზოგადოების მდგრადობის ამაღლებას, ციფრული ტრანსფორმაციის, ციფრული მმართველობის, სანდო და კვალიფიციური მომსახურების, ასევე პერსონალური მონაცემების დაცვის მიმართულებით ინფორმაციული საზოგადოების ცნობიერების ამაღლებას.
გარდა ძირითადი მიზნებისა, ხელმომწერი მხარეები შემდეგი პრიორიტეტული მიმართულებების განხორციელებაზე თანხმდებიან:
კიბერუსაფრთხოებისა და ციფრული მმართველობის კუთხით ცნობიერების ამაღლების კამპანიებისა და ცალკეული აქტივობების განხორციელება, ინფორმაციული საზოგადოების კიბერ კულტურის ჩამოყალიბების ხელშეწყობა,ელექტრონული სერვისების ხელმისაწვდომობის, მიწოდებისა და პოპულარიზაციის ხელშემწყობი ღონისძიებების გამართვა, ასევე კიბერუსაფრთხოებისა და ციფრული მმართველობის ხელშემწყობი მიმართულებების პოპულარიზაცია. აღნიშნული მიმართულებების ფარგლებში ორგანიზაციები კიბერუსაფრთხოებისა და ციფრული მმართველობის საკითხებზე ინფორმაციული შეხვედრების, სწავლებისა და ტრენინგების ერთობლივ ორგანიზებას გეგმავენ, რისთვისაც ადამიანური და ფინანსური რესურსების გაერთიანების მზადყოფნასაც გამოთქვამენ.
მემორანდუმის ფარგლებში მნიშვნელოვანი აქცენტი ზემოჩამოთვლილი მიმართულებების სამართლებრივი გარემოს ანალიზზე გაკეთდება, რის ფარგლებშიც ხელმომწერი ორგანიზაციები კიბერუსაფრთხოებისა და ციფრული მმართველობის საკითხებთან დაკავშირებით ევროკავშირის რეგულაციებისა და დირექტივების, ასევე მსოფლიო საუკეთესო პრაქტიკის მაგალითების შესწავლასა და განხილვას გეგმავენ.
სიახლეების გამოწერა
