ფაქტობრივი გარემოებები: არასამთავრობო ორგანიზაციამ, რომელიც მუშაობდა ეკოლოგიურ საკითხებზე, მიმართა ტემელინის (ჩეხეთი) ადგილობრივი თვითმმართველობის ორგანოს სამშენებლო სამსახურს და მოითხოვა ინფორმაცია ტემელინის ატომური ენერგიის სადგურის თაობაზე, კერძოდ ოფიციალური დოკუმენტები და ნახაზები (სქემები), რათა შეეფასებინა ატომური ენერგიის სადგურის ზეგავლენა გარემოზე. არასამთავრობო ორგანიზაციას აღნიშნული ინფორმაციის მიწოდებაზე უარი ეთქვა.    

სასამართლოს დასაბუთება: ადამიანის უფლებათა ევროპულმა სასამართლომ არსებით განხილვაზე არ მიიღო საჩივარი.დასაშვებობის შესახებ გადაწყვეტილებაში, სასამართლომ აღნიშნა, რომ ინფორმაციის მიწოდებაზე უარი წარმოადგენდა ადამიანის უფლებათა ევროპული კონვენციის მე-10 მუხლით გარანტირებულ ინფორმაციის მიღების უფლებაში ჩარევას. სასამართლომ  განმარტა, რომ როდესაც მოთხოვნილი ინფორმაცია წარმოადგენს მაღალი საჯარო ინტერესის საგანს ან მიმდინარეობს საჯარო დისკუსია აღნიშნულ საკითხთან დაკავშირებით, სახელმწიფოს უარი ინფორმაციის ხელმისაწვდომობასთან დაკავშირებით უნდა დაექვემდებაროს საზოგადოების მხრიდან მკაცრ ზედამხედველობას და უნდა შეიცავდეს შესაბამის და საკმარის დასაბუთებას.  

სასამართლომ დაადგინა, რომ განსახილველ შემთხვევაში, ინფორმაციის მიწოდებაზე უარი გამართლებული იყო ადამიანის უფლებათა ევროპული კონვენციის მე-10 მუხლის მე-2 ნაწილის საფუძველზე ეროვნული უსაფრთხოების (ტერორისტული თავდასხმის რისკი), სხვათა უფლებების (სამრეწველო საიდუმლოების დაცვა) და ჯანმრთელობის დაცვის მიზნით. სასამართლომ ასევე აღნიშნა, რომ ატომური ენერგიის სადგურის თაობაზე მოთხოვნილი ტექნიკური ინფორმაცია არ წარმოადგენდა საჯარო ინტერესს.    

მომზადდა ღია საზოგადოების ფონდის (OSF) ადამიანის უფლებათა სტაჟირების 2013 წლის გრანტის ფარგლებში.