23 აპრილს ინფორმაციის თავისუფლების განვითარების ინსტიტუტმა (IDFI) აჭარის უმაღლესი საბჭოს თანამშრომლებთან სამუშაო შეხვედრა გამართა პეტიციის წარდგენისა და განხილვის პროცედურებთან დაკავშირებულ საკითხებზე.
წერილობითი და ელექტრონული პეტიციის დანერგვა აჭარის უმაღლესი საბჭოს ღია მმართველობის 2020-2021 წლების სამოქმედო გეგმით გათვალისწინებული მე-4 ვალდებულებაა. აჭარის უმაღლესი საბჭოსთვის წერილობითი პეტიციით მიმართვის შესაძლებლობა ამოქმედდება 2021 წლის 1 მაისიდან.
შეხვედრაში მონაწილეობდა საქართველოს პარლამენტის საპროცედურო საკითხთა და წესების კომიტეტის წარმომადგენელი, რომელმაც უმაღლეს საბჭოს აპარატს გაუზიარა პარლამენტის გამოცდილება წერილობითი და ელექტრონული პეტიციის წარდგენისა და განხილვის წესთან დაკავშირებით.
სამუშაო შეხვედრა გაიმართა ევროკავშირისა (EU) და გაეროს განვითარების პროგრამის (UNDP) პროექტის - „საპარლამენტო დემოკრატიის კონსოლიდაცია საქართველოში“ ფარგლებში. პროექტი მჭიდროდ თანამშრომლობს ინფორმაციის თავისუფლების განვითარების ინსტიტუტთან (IDFI), საქართველოს პარლამენტსა და აჭარის უმაღლეს საბჭოში ღია მმართველობის პრინციპების დანერგვის ხელშეწყობის მიზნით.
სიახლეების გამოწერა
