2021 წლის 24-25 ივნისს,  სახელმწიფო ინსპექტორის სამსახურთან თანამშრომლობით „ინფორმაციის თავისუფლების განვითარების ინსტიტუტმა” (IDFI) და “სოციალური სამართლიანობის ცენტრმა” მედიის წარმომადგენლებთან სამუშაო შეხვედრა გამართეს. 

მონაწილეებს მისასალმებელი სიტყვით მიმართეს სახელმწიფო ინსპექტორმა ლონდა თოლორაიამ, „ინფორმაციის თავისუფლების განვითარების ინსტიტუტის“ აღმასრულებელმა დირექტორმა გიორგი კლდიაშვილმა და სოციალური სამართლიანობის ცენტრის პროექტების კოორდინატორმა თამარ გვასალიამ.  

მედიის წარმომადგენლებმა დამსწრეებს გაუზიარეს სამუშაო შეხვედრასთან დაკავშირებით მათი მოლოდინები, რის შემდეგაც სახელმწიფო ინსპექტორის მოადგილემ, სოფიო ჯიაძემ სახელმწიფო ინსპექტორის სამსახურის ფუნქციებზე, პერსონალურ მონაცემთა დაცვის სფეროში სახელმწიფო ინსპექტორის სამსახურის მიღწევებსა და არსებულ გამოწვევებზე ისაუბრა. 

მეორე სესია საგამოძიებო მიმართულებით სახელმწიფო ინსპექტორის სამსახურის საქმიანობას დაეთმო, სადაც სახელმწიფო ინსპექტორის პირველმა მოადგილემ, გიორგი გამეზარდაშვილმა საგამოძიებო მიმართულებით არსებულ წარმატებებზე, დაგროვილ გამოცდილებებსა და დაბრკოლებებზე გაამახვილა ყურადღება. მომხსენებელმა ხაზი გაუსვა იმ პრობლემებს, რომლებიც სახელმწიფო ინსპექტორის სამსახურის გამომძიებლებს სამსახურის ქვემდებარე საქმეებზე შეტყობინებათა დროულად მიღების, გამოძიების სწრაფად და ეფექტიანად განხორციელებისა და მტკიცებულებათა მოპოვების პროცესში აქვთ. 

IDFI-სა და სოციალური სამართლიანობის ცენტრის წარმომადგენლებმა შეხვედრის მონაწილეებს გააცნეს კვლევის “დამოუკიდებელი საგამოძიებო მექანიზმი საქართველოში - მიღწევები და არსებული გამოწვევები” ძირითადი მიგნებები, რომლის საჯარო პრეზენტაცია 2021 წლის 12 ივლისს იგეგმება. IDFI-ს და სოციალური სამართლიანობის ცენტრის ეს ერთობლივი კვლევა პირველი დოკუმენტია, რომელიც სრულყოფილად მიმოიხილავს დამოუკიდებელი საგამოძიებო მექანიზმის საქმიანობას და ყურადღებას ამახვილებს სამსახურის ინსტიტუციური გაძლიერებისა და დამოუკიდებლობის ხარისხის გაზრდის მიზნით გასატარებელ ღონისძიებებზე.

მომხსენებლების გამოსვლის შემდეგ, მედიის წარმომადგენლების აქტიური ჩართულობით გაიმართა დისკუსია, რომლის ფარგლებშიც მონაწილეებმა იმსჯელეს სახელმწიფო ინსპექტორის სამსახურის საქმიანობის შესახებ საზოგადოების ცნობიერების ამაღლების მიზნით  თანამშრომლობის სამომავლო გეგმებზე.

ღონისძიება გაიმართა პროექტის “სახელმწიფო ინსპექტორის სამსახურის საქმიანობის მხარდაჭერა” ფარგლებში, რომელსაც “ღია საზოგადოების ფონდის (OSGF)” მხარდაჭერით, “ინფორმაციის თავისუფლების განვითარების ინსტიტუტი (IDFI)” “სოციალური სამართლიანობის ცენტრთან” თანამშრომლობით ახორციელებს.