17 ნოემბერს იუნესკოს გენერალურმა კონფერენციამ მხარი დაუჭირა 28 სექტემბრის „ინფორმაციის უნივერსალური ხელმისაწვდომობის საერთაშორისო დღედ“ დაწესების შესახებ ინიციატივას. აღსანიშნავია, რომ ინიციატივა იუნესკოში აფრიკის ქვეყნების - მაროკოს, ანგოლისა და ნიგერიის სახელმწიფო და საზოგადოებრივი ჯგუფების წარმომადგენლების მიერ იქნა წარდგენილი.

უნდა ითქვას, რომ მსოფლიოში 2002 წლიდან აღინიშნება „ინფორმაციის თავისუფლების დღე“. აღნიშნულს საფუძველი სამოქალაქო საზოგადოების წარმომადგენლებმა ჯერ კიდევ 2002 წლის 26-28 სექტემბერს, სოფიაში გამართლ კონფერენციაზე ჩაუყარეს. აღნიშნული განსხვავებით იუნესკოს 17 ნოემბრის რეზოლუციით დაწესებული „ინფორმაციის უნივერსალური ხელმისაწვდომობის საერთაშორისო დღისა“ არაფორმალურ ხასიათს ატარებდა.

იუნესკოს რეზოლუცია, კიდევ ერთხელ ხაზს უსვამს ინფორმაციის ხელმისაწვდომობის უფლების მნიშვნელობასა და აუცილებლობას დემოკრატიული საზოგადოების განვითარებისათვის. დოკუმენტში ასევე აღნიშნულია, რომ მიუხედავად ინფორმაციის ხელმისაწვდომობის მნიშვნელობისა ჯერ კიდევ არსებობს ამ საკითხთან მიმართებით საყურადღებო გამოწვევები. მაგალითად, მრავალ ქვეყანაში საკანონმდებლო დონეზე არ არის უზრუნველყოფილი ინფორმაციის ხელმისაწვდომობა. რეზოლუციაში გამოთქმულია იმედი, რომ მოცემული ინიციატივა ხელს შეუწყობს საზოგადოების ცნობიერების ამაღლებას და იქნება საერთაშორისო დონის გზავნილი ინფორმაციის ხელმისაწვდომობის უფრო მაღალი ხარისხით უზრუნველყოფისთვის. ორგანიზაციის განცხადებით ყოველი წლის 28 სექტემბერს ექნება სიმბოლური ხასიათი და საერთაშორისო მასშტაბით მოხდება მთელი რიგი აქტივობების, კონფერენციების, სამუშაო შეხვედრებსა და სხვა ცნობიერების ასამაღლებელი ღონისძიებების ორგანიზება.

რეზოლუცია იწვევს ყველა წევრ სახელმწიფოს, გაერთიანებული ერების სისტემის ორგანიზაციებსა და სხვა საერთაშორისო ორგანიზაციებს, ისევე როგორც სამოქალაქო საზოგადოებასა და არასამთავრობო სექტორს აქტიური მონაწილეობა მიიღონ მოცემულ დღეს სხვადასხვა სახის ცნობიერების ასამაღლებელი აქტივობების განხორცილებაში.