18-20 ნოემბერს ინფორმაციის თავისუფლების განვითარების ინსტიტუტმა (IDFI), კონსულტაციის და ტრენინგის ცენტრმა (CTC) და მმართველობითი სისტემების განვითარების ცენტრმა (MSDC) რეგიონული ორგანიზაციებისთვის ადგილობრივი თვითმმართველობის ინდექსის შესახებ სამდღიანი ტრენინგი ჩაატარეს.

ადგილობრივი თვითმმართველობის ინდექსი ხსენებული ორგანიზაციების ერთობლივი ინიციატივაა, რომელიც მუნიციპალიტეტების ანგარიშვალდებულებასა და გამჭვირვალობას აფასებს.

ტრენინგი მიზნად ისახავდა პარტნიორი რეგიონული ორგანიზაციების წარმომადგნელებისთვის ინდექსის შეფასების მეთოდოლოგიის გაცნობას. მომავალში მათ ამ მეთოდოლოგიით მუნიციპალიტეტების აღმასრულებელი და წარმომადგენლობითი ორგანოები უნდა შეაფასონ.

ტრენინგის მონაწილეებმა მიიღეს მუნიციპალიტეტების ანგარიშვადებულებისა და გამჭვირვალობის შეფასების როგორც თეორიული ცოდნა, ისე პრაქტიკული გამოცდილება. კერძოდ, ისინი დეტალურად გაეცნენ ინდექსის მეთოდოლოგიას და გადაეცათ შემფასებელთა სახელმძღვანელო.
ინდექსის მეთოდოლოგია სამი ნაწილისგან შედგება: საჯარო ინფორმაციის პროაქტიული გამოქვეყნება, ელ-მმართველობა და მოქალაქეთა მონაწილეობა და ანგარიშვალდებულება. მონაწილეები გაეცნენ ინფორმაციის ხარისხის შეფასების კრიტერიუმებსა და ინფორმაციის სანდოობის გადამოწმების საშუალებებს.

ტრენინგს IDFI-დან უძღვებოდნენ თეონა ტურაშვილი და გოგა თუშურაშვილი, CTC-დან – თამარ ნასყიდაშვილი და MSDC-დან – კოკა კიღურაძე.

ტრენინგში მონაწილეობა მიიღეს შემდეგი რეგიონული ორგანიზაციის წარმომადგენლებმა: ადგილობრივი დემოკრატიის სააგენტო საქართველო (LDA), ასოციაცია „დეა“, დემოკრატ მესხთა კავშირი (UDM), მწვანე კავკასია, სამოქალაქო საზოგადოების ინსტიტუტი - ბათუმი (CSI), სათემო ორგანიზაცია ნუკრიანი და საქართველოს დემოკრატიული განვითარების კავშირი.

ტრენინგი ჩატარდა ღია საზოგადოების ფონდის (OSGF) ფინანსური დახმარებით. 

ტრენინგის შესახებ ფოტოალბომი იხილეთ აქ.