ინფორმაციის თავისუფლების განვითარების ინსტიტუტი საკუთარ ვებგვერდზე ვრცელ განცხადებას ავრცელებს, რომელშიც ორგანიზაცია IDFI-ის პარტნიორი ორგანიზაციის დამფუძნებლის ოჯახის რუსეთიდან დეპორტაციაზეა საუბარი.

როგორც განცხადებიდან ვიგებთ, საემიგრაციო სამსახური თავის გადაწყვეტილებაში ეყრდნობა ფედერალურ კანონს „რუსეთის ფედერაციაში უცხოეთის მოქალაქეების სამართლებრივი მდგომარეობის თაობაზე“. აღნიშნული კანონი ითვალისწინებს უცხოელი მოქალაქის დეპორტაციას იმ შემთხვევაში თუ იგი „ძალადობრივი გზით ცდილობს რუსეთის ფედერაციის კონსტიტუციური წყობის შეცვლას“, თუმცა ორგანიზაციის თქმით, გაურკვეველია კონკრეტულად რა ქმედებებით უქმნის საფრთხეს რუსეთის ფედერაციას ჯენიფერ გასპარი.

"როგორც 5 აგვისტოს გახდა ცნობილი, რუსეთის ფედერალურმა საემიგრაციო სამსახურმა ბინადრობის ნებართვა ჩამოართვა აშშ-ს მოქალაქეს ჯენიფერ სიუზან გასპარს, „ინფორმაციის თავისუფლების ფონდის“ დამფუძნებლის ივან პავლოვის მეუღლეს.

საემიგრაციო სამსახური თავის გადაწყვეტილებაში ეყრდნობა ფედერალურ კანონს „რუსეთის ფედერაციაში უცხოეთის მოქალაქეების სამართლებრივი მდგომარეობის თაობაზე“. აღნიშნული კანონი ითვალისწინებს უცხოელი მოქალაქის დეპორტაციას იმ შემთხვევაში თუ იგი „ძალადობრივი გზით ცდილობს რუსეთის ფედერაციის კონსტიტუციური წყობის შეცვლას ან სხვა ქმედებებით წარმოადგენს საფრთხეს რუსეთის ფედერაციისა და მისი მოქალაქეების უსაფრთხოებისათვის“.

გაურკვეველია კონკრეტულად რა ქმედებებით უქმნის საფრთხეს რუსეთის ფედერაციას ჯენიფერ გასპარი. მისი საქმიანობის სფერო მოიცავს სამართალს, ბუღალტრულ აღრიცხვასა და აუდიტს, ასევე საწარმოების მართვის საკითხებში კონსულტაციების გაწევას. კერძოდ, ის ორგანიზაციული საქმიანობისა და განვითარების ექსპერტია, ეხმარებოდა ერმიტაჟის სახელმწიფო ფონდს.

ივან პავლოვი დარწმუნებულია, რომ გასპარის ქვეყნიდან დეპორტაციის მუქარით რუსეთის ხელისუფლება მას უპირისპირდება. „ინფორმაციის თავისუფლების ფონდის“ წინააღმდეგ რუსეთის ხელისუფლების ბოლოდროინდელი ქმედებების გათვალისწინებით ივან პავლოვს მსგავსი მოსაზრების საფუძველი ნამდვილად გააჩნია.

2014 წლის იანვარში რუსეთის პროკურატურის მიერ ჩატარებული შემოწმების შედეგად „ინფორმაციის თავისუფლების ფონდს“ მოსთხოვეს დარეგისტრირებულიყო იუსტიციის სამინისტროში როგორც უცხოური აგენტი. პროკურატურამ მიიჩნია, რომ ფონდი ახორციელებს „პოლიტიკური ნიშნების შემცველ“ საქმიანობას, რომელიც „მიმართულია საზოგადოებრივი აზრის ჩამოყალიბებისკენ ხელისუფლების ორგანოებისათვის მინიჭებული უფლებამოსილებების განხორციელებისა და არსებული ხელისუფლების მიერ წარმართული პოლიტიკის არაეფექტურობის თაობაზე“.

ივან პავლოვის ბლოგის მიხედვით, პროკურატურა საზოგადოებრივი აზრის ჩამოყალიბებისკენ მიმართულ, და შესაბამისად პოლიტიკურ საქმიანობად მიიჩნევს 2013 წლის სექტემბერში, G20-ის სამიტის ფარგლებში ბარაკ ობამასთან შეხვედრაში ივან პავლოვის მონაწილეობას, პერსონალურ მონაცემთა შესახებ კანონმდებლობის ცვლილებების ანალიზის მომზადებას, „ცოდნის უფლების პრემიისა და ანტიპრემიის“ დაჯილდოების ორგანიზებას, ფონდის პროგრამული დირექტორის მონაწილეობას OGP-ის ლონდონის სამიტში და ხელისუფლების ორგანოების ოფიციალური ვებ-გვერდების მონიტორინგის შედეგების გამოქვეყნებას. ამას გარდა, პავლოვი არაერთხელ გამოსულა რუსეთის ფედერალური უსაფრთხოების ოპონენტის როლში, როგორც ადვოკატი და უფლებადამცველი. ამჟამად პავლოვი იცავს ისტორიკოს მიხაილ სუპრუნს, რომელიც რეპრესირებული გერმანელების შესახებ ჩატარებული კვლევის გამო „პირადი და ოჯახური საიდუმლოების“ დარღვევისთვის გაასამართლეს. ისტორიკოსის საჩივარს ადამიანების უფლებათა ევროპული სასამართლო განიხილავს.

ივან პავლოვი აპირებს რუსეთის საემიგრაციო სამსახურის გადაწყვეტილების გასაჩივრებას მისი მეუღლის დეპორტაციის თაობაზე.

2004 წელს დაარსებული ორგანიზაცია „ინფორმაციის თავისუფლების ფონდი“ IDFI-ის ერთ-ერთი პირველი პარტნიორი ორგანიზაციაა. ფონდმა დიდი დახმარება გაუწია IDFI-ის თავისი საქმიანობის დასაწყისში. აღსანიშნავია, რომ რუსეთის პროკურატურის მიერ ფონდის პოლიტიკური საქმიანობის მაგალითად მიჩნეული ვებ-გვერდების მონიტორინგის მეთოდოლოგია IDFI-ის აქვს გამოყენებული თავის ერთ-ერთ პირველ კვლევაში. 2010 წელს ივან პავლოვი ვიზიტით იმყოფებოდა საქართველოში და მონაწილეობდა IDFI-ის მიერ გამართულ ტრენინგში საჯარო ინფორმაციის გამოთხოვის პრაქტიკის თაობაზე. ამჟამად IDFI თანამშრომლობს ფონდთან ხელისუფლების ელექტრონული ღიაობის საერთაშორისო კვლევაში, რომელიც მოიცავს საქართველოს, ბელორუსს, რუსეთსა და აშშ-ს.

IDFI მხარდაჭერას უცხადებს ივან პავლოვის ოჯახსა და რუსეთის ინფორმაციის თავისუფლების განვითარების ფონდს. ვიმედოვნებთ, რომ ორგანიზაცია კვლავაც შეუფერხებლად გააგრძელებს საკუთარ საქმიანობას რუსეთში ინფორმაციის გამჭვირვალობისა და ხელისუფლების ანგარიშვალდებულების ხელშეწყობის მიმართულებით." - ნათქვამია განცხადებაში.

იხილეთ სტატია