19 მარტს ღამით ცნობილი გახდა, რომ რუსეთის ფედერაციის საგარეო საქმეთა მინისტრის  სერგეი ლავროვის სანქცირებული შვილი, თანმხლებ პირებთან ერთად, საქართველოს ტერიტორიაზე იმყოფებოდა და გეგმავდა ქორწილის აღნიშვნას. სერგეი ლავროვი არის ოკუპანტი სახელმწიფოს საგარეო საქმეთა მინისტრი, რომელიც საერთაშორისო არენაზე ეწინააღმდეგება საქართველოს ტერიტორიულ მთლიანობისა და სუვერენიტეტს. ოკუპანტი სახელმწიფოს ერთ-ერთი წამყვანი პოლიტიკური თანამდებობის პირის სანქცირებული შვილისა და მისი ნათესავების საქართველოში ვიზიტმა საზოგადოების სამართლიანი აღშფოთება გამოიწვია. 

ხაზგასმით უნდა აღინიშნოს, რომ ლავროვის ოჯახის წევრები არ არიან რიგითი რუსი „ტურისტები“ და ისინი საქართველოში არ/ვერ შემოვიდოდნენ უსაფრთხოების სათანადო გარანტიების გარეშე. ამ გარანტიების გაცემა საქართველოს უმაღლესი პოლიტიკური თანამდებობის პირებისა და სახელმწიფო უსაფრთხოების სამსახურის ჩართულობის გარეშე, სავარაუდოდ, ვერ მოხდებოდა. აღნიშნული კი, შესაძლოა, ქართული და რუსული სპეცსამსახურების კოორდინაციასა და ერთობლივ მოქმედებაზე მიუთითებდეს. ამ ეჭვს აძლიერებს ის გარემოება, რომ საპოლიციო და უსაფრთხოების ძალებმა ყვარელში გამართული მცირე ზომის მანიფესტაციის  მონაწილეებისა და პრესის მიმართ დაარღვიეს საქართველოს კონსტიტუცია, გამოიყენეს არაადეკვატური ძალები და მიიღეს ყველა ზომა საინფორმაციო ვაკუუმის შესაქმნელად. მეტიც,შსს-მ, სავარაუდოდ, გამოიყენა რადიო ელექტრონული საშუალებები ადგილზე საკომუნიკაციო სიგნალის ჩასახშობად. 

შემაშფოთებელია, რომ არცერთ კომპეტენტურ სახელმწიფო უწყებას ამ დრომდე არ გაუკეთებია განცხადება რუსეთის ფედერაციის საგარეო საქმეთა მინისტრის - სერგეი ლავროვის ოჯახის წევრების საქართველოში ვიზიტთან დაკავშირებით.

მიუხედავად საზოგადოება გაჩენილი კითხვებისა და პროტესტისა, საქართველოს შსს-სა და სუს-ს ჯერაც არგაუკეთებიათ განმარტება  ლავროვის ოჯახის წევრების საქართველოში ჩამოსვლის  და/ან მათ მიერ საქართველოს ტერიტორიის დატოვების საკითხზე.

შსს-სა და სუს-ის დუმილი, არის, სულ მცირე, ქართული საზოგადოების უპატივცემულობაა. 

მოვუწოდებთ სახელმწიფო უსაფრთხოების სამსახურს და საქართველოს შინაგან საქმეთა სამინისტროს, გამოიჩინონ გამბედაობა და დაუყოვნებლივ გააკეთონ დეტალური განმარტება სერგეი ლავროვის ოჯახის წევრების საქართველოში ვიზიტთან დაკავშირებით.