პარტნიორობა ღია მართველობის (OGP) სამომავლო გეგმებსა და სამოქალაქო საზოგადოების როლის გაატიურებაზე მსჯელობენ OGP-ის წევრი ქვეყნების წარმომადგენლები ვორქშოფზე, რომელიც ჰააგაში 2 სექტემბერს გაიხსნა და სამ დღეს გაგრძელდება.

შეხვედრა ორგანიზებულია OGP-ის სამოქალაქო სექტორის მმართველი კომიტეტის მიერ და მასში მონაწილეობას იღებენ OGP-ის მმართველი კომიტეტის წევრები, სამოქალაქო საზოგადოების წარმომადგენლები დიდი ბრიტანეთიდან, ნიდერლანდებიდან, მექსიკიდან, საფრანგეთიდან, საქართველოდან, ინდონეზიიდან, კენიიდან და სამხრეთ აფრიკიდან.

შეხვედრაზე საქართველოს „ინფორმაციის თავისუფლების განვითარების ინსტიტუტის“ (IDFI) დირექტორი და ღია მმართველობა საქართველოს ფორუმის თანათავმჯდომარე გიორგი კლდიაშვილი წარმოადგენს.

ჰააგაში გამართული ვორქშოფის მიზანია მხარი დაუჭიროს სამოქალაქო საზოგადოებას, რათა მათ გააძლიერონ ქვეყნის რეფორმების, სამოქმედო გეგმის ფარგლებში აღებული ვალდებულებების შესრულებაში სამოქალაქო საზოგადოების მონაწილეობა და მონიტორინგი. შეხვედრის მონაწილენი მსჯელობენ რა მიმართულებით უნდა გაუმჯობესდეს OGP-ის წევრ ქვეყნებში სამოქალაქო საზოგადოებასა და მთავრობას შორის თანამშრომლობა და პარტნიორობა. ასევე, განიხილება ის ეფექტური მექანიზმები, რომლებიც ღია მმართველობის განსავითარებლად მმართველი კომიტეტის წევრ ქვეყნებში სამოქალაქო ორგანიზაციებმა შეიძლება გამოიყენონ.

საქართველო OGP-ის მმართველი კომიტეტის წევრად მიმდინარე წელს აირჩიეს. ქვეყანამ პარტნიორობის ფარგლებში უკვე მეორე, 2014-2015 წლის სამოქმედო გეგმა შეიმუშავა, რომლის ფარგლებში 16-მა საჯარო უწყებამ 26 ვალდებულება უნდა შეასრულოს.