20 ნოემბერს საქართველოს მთავრობამ გამოაქვეყნა
სამთავრობო პროგრამა „ძლიერი, დემოკრატიული, ერთიანი საქართველოსთვის“. მასში რამდენიმე პროგრამულ მიმართულებას შორის დასახულია შინაგან საქმეთა სამინისტროს რეფორმის ძირითადი პრინციპები, სადაც ხაზგასმულია, რომ „განსაკუთრებული ყურადღება დაეთმობა სამინისტროს ანგარიშვალდებულებისა და გამჭვირვალობის უზრუნველმყოფი სისტემების, მათ შორის, პროაქტიული საჯარო ინფორმაციის გამოქვეყნების სისტემების დანერგვა/გაუმჯობესებას“.
ინფორმაციის თავისუფლების განვითარების ინსტიტუტი (IDFI) მიესალმება იმ ფაქტს, რომ საჯარო ინფორმაციის პროაქტიული გამოქვეყნება გაცხადებულ იქნა, როგორც შინაგან საქმეთა სამინისტროს რეფორმის მნიშვნელოვანი ნაწილი. თუმცა, ვთვლით, რომ საჯარო ინფორმაციის ხელმისაწვდომობა და ანგარიშვალდებულების გაზრდა უნდა იყოს საქართველოს მთავარობის უმნიშვნელოვანესი პრიორიტეტი, როგორც დემოკრატიული მმართველობის განვითარების მექანიზმი და ეს უნდა განიხილებოდეს, როგორც ყველა სახელმწიფო ინსტიტუტის რეფორმის შემადგენელი ნაწილი. სამწუხაროდ, სამთავრობო პროგრამაში ღია და გამჭვირვალე მმართველობა არ არის ფორმულირებული, როგორც ცალკე პრიორიტეტი.
სიახლეების გამოწერა
