28 მარტს, შეერთებული შტატების საერთაშორისო განვითარების სააგენტოს (ჲშაჳდ) პროგრამის – დემოკრატიული მმართველობის პროგრამა საქართველოში ( G -3) მხარდაჭერით სოფელ სართიჭალის მოსახლეობისთვის IDFI -მ ვორქშოპი გამართა.
ღონისძიება პროექტის – “კანონმდებლობის გაუმჯობესება და საზოგადოებრივი ცნობიერების ამაღლება ინფორმაციის თავისუფლების საკითხებში” – ფარგლებში ჩატარდა.

შეხვედრა გაიმართა სსიპ სახელმწიფო სერვისების განვითარების სააგენტოს სართიჭალის საზოგადოებრივ ცენტრში. ღონისძიება მიზნად ისახავდა საზოგადოების ცნობიერების ამაღლებას ინფორმაციის თავისუფლების საკითხებში და გადაწყვეტილების მიღების პროცესში მოქალაქეების მონაწილეობის წახალისებას.

IDFI -ს დირექტორმა, გიორგი კლდიაშვილმა დამსწრე საზოგადოებას ღია მმართველობის პარტნიორობის (OGP) შესახებ მიაწოდა ინფორმაცია და მათ მთავრობის ინიციატივები, ნაკისრი ვალდებულებები გააცნო. გიორგი კლდიაშვილმა ისაუბრა ასევე საქართველოში ინფორმაციის ხელმისაწვდომობის კანონმდებლობასა და პრაქტიკაზე, ინფორმაციის მოთხოვნისა და მიღების გზებზე.

ვორკშოპში აქტიური მონაწილეობა მიიღეს საზოგადოებრივი ცენტრისა და ადგილობრივი თვითმმართველობის წარმომადგენლებმა, ბიბლიოთეკარებმა, პედაგოგებმა და სხვა დაინტერესებულმა მოქალაქეებმა.

შეხვედრა დისკუსიის ფორმატში მიმდინარეობდა. დაისვა საკითხი თუ რა ხერხებით შეძლებს მოსახლეობა ხმა მიაწვდინოს მთავრობას და საკუთარი მოსაზრებები და ხედვები მიიტანოს გადაწყვეტილების მიმღებ პირებამდე. გიორგი კდიაშვილმა მოქალაქეებს იმ მექანიზმებზე მიაწოდა ინფორმაცია, რომლებიც ელექტრონული გზით ჩართულობის უზრუნველყოფას ემსახურება – პეტიციები, საჯარო განხილვები, ვებ-გვერდებზე კომენტარების და შეკითხვების გაგზავნის შესაძლებლობა. მან ისაუბრა პროცესის გამჭვირვალობის აუცილებლობაზე, რაც უზრუნველყოფილია ელექტრონულ მონაწილეობის დროს.

მოქალაქეებმა დასვეს შეკითხვები მათთვის საინტერესო საკითხებზე, ხაზგასმით აღნიშნეს მთავრობის ხარჯების, საქმიანობისა და დაგეგმილი პროექტების შესახებ ინფორმაციის დროულად მიღების და საკანონმდებლო თუ სხვა ინიციატივების განხილვაში მონაწილეობის აუცილებლობა.