2010 წლის 4 მაისს ინტერნეტ გამოცემა civil.ge-ს ინფორმაციით საქართველოს რეგიონალურმა პრესამ პროტესტი გამოხატა საჯარო ინფორმაციის მიღების შეზღუდვებთან დაკავშირებით:  რამდენიმე რეგიონული გაზეთი 3 მაისს, როდესაც მსოფლიო პრესის თავისუფლების დღეს აღინიშნავს, ცარიელი მთავარი გვერდით დაიბეჭდა, სადაც მხოლოდ ერთი წინადადება ეწერა: “მოგვეცით საჯარო ინფორმაცია”. 

16 რეგიონული გაზეთის მიერ გავრცელებულ ერთობლივ განცხადებაში ნათქვამია, რომ ისინი ხშირად აწყდებიან დაბრკოლებებს სახელმწიფო სტრუქტურებიდან საჯარო ინფორმაციის მიღებისას. საქართველოს ზოგადი ადმინისტრაციული კოდექსი, რომელიც საჯარო ინფორმაციაზე ხელმისაწვდომობას უზრუნველყოფს საქართველოში 2000 წლიდან შევიდა ძალაში.

განცხადებაში გაზეთები მოუწოდებენ პარლამენტს და პრეზიდენტს, რომ “ფასადური გამჭვირვალობის” ნაცვლად სახელმწიფო სტრუქტურების რეალური გამჭვირვალობა უზრუნველყონ.

საქართველოს ახალგაზრდა იურისტთა ასოციაციამ (საია) 3 მაისს ასევე გაავრცელა განცხადება, სადაც ნათქვამია, რომ “ბოლო დროს განსაკუთრებით მომრავლდა სახელმწიფო ორგანოების მხრიდან ჟურნალისტების სრული იგნორირების შემთხვევები”. ორგანიზაციის თქმით, თბილისის მერია “აბსოლუტურად უკანონო უარს ამბობს” საიას-თვის საჯარო ინფორმაციის მიწოდებაზე. ორგანიზაციის განცხადებით, ადგილობრივი თვითმართველობის ორგანოები “უფრო მეტად აღრმავებენ ინფორმაციის თავისუფლებისათვის დაწესებული ბარიერების სამარცხვინო პრაქტიკას”.

http://www.civil.ge/geo/article.php?id=22658