3 ივლისს IDFI-ს ორგანიზებით გაიმართა პრესკონფერენცია იმ კითხვებთან დაკავშირებით, რაც ციფრულ მაუწყებლობაზე გადასვლის დაწყების შემდგომ საზოგადოებაში გაჩნდა. კერძოდ, საუბარი იყო იმაზე, რომ ქალაქ რუსთავის ნაწილს ჰქონდა ციფრული მაუწყებლობის მიღების პრობლემა.

ინფორმაციის თავისუფლების განვითარების ინსტიტუტმა (IDFI) და კომუნიკაციების ეროვნულმა კომისიამ (GNCC) ჩაატარა აღნიშნული საკითხის მონიტორინგი და შედეგები მედიას და საზოგადოებას გააცნო. 

პრესკონფერენციაზე IDFI-ს ექსპერტმა, უჩა სეთურმა, ასევე GNCC-ს, ციფრული მაუწყებლობის სააგენტოს, რეგიონულ მაუწყებელთა ასოციაციის და ქვემო ქართლის ტელევიზიის წარმომადგენლებმა ერთხმად აღნიშნეს, რომ ხარვეზები სეტ-ტოპ-ბოქსებთან და ციფრული სიგნალის გავრცელებასთან დაკავშირებით არ არსებობს.

მცირე ხარვეზები შესაძლოა შექმნას ოთახის ანტენებმა, რისი გადაწყვეტაც მარტივად, მათი გარეთ ან სახურავზე განთავსებით შეიძლება, თუმცა თუ ანტენა მხოლოდ მეტრულია, ის დეციმეტრულ სიგნალს ვერ მიიღებს.

უჩა სეთურმა აღნიშნა, რომ რუსთავში, გარდაბანში, მარნეულში სიგნალის მიღებასთან დაკავშირებით პრობლემა არ არსებობს, ასევე კუმისში, რომელსაც სატელევიზიო სიგნალი არასდროს მიეწოდებოდა, ამჟამად ჩართულია 15-მდე არხი მაღალი ხარისხით.