28 სექტემბერს ფონდ “ღია საზოგადოება საქართველოს“ ოფისში ინფორმაციის მიღების უფლების საერთაშორისო დღესთან დაკავშირებით “ინფორმაციის თავისუფლების განვითარების ინსტიტუტმა” გამართა ახალი პროექტის “საჯარო ინფორმაციის ონლაინ რესურს ბაზა“ პრეზენტაცია.
პროექტი დაფინანსებულია ფონდ “ღია საზოგადოება საქართველოს“ მიერ და ითვალისწინებს ახალი ვებ გვერდის შექმნას, სადაც განთავსდება ინსტიტუტის მიერ მოპოვებული საჯარო ინფორმაციები თემატიკის მიხედვით. პრეზენტაციაზე პროექტის დირექტორმა ლევან ავალიშვილმა ასევე ისაუბრა პროექტის მედია კომპონენტზეც. მისი თქმით პროექტის ფარგლებში იგეგმება მედია კლუბის შექმნა, რაც ითვალისწინებს მედიის წარმომადგებლებთან რეგულარული დიალოგის ფორმატის შექმნას საჯარო ინფორმაციის ხელმისაწვდომობის შესახებ. ეს ინიციატივა ხელს შეუწყობს მედიის გამოდილების ურთიერთგაცვლას და მედიის ჩართულობას და ასევე მედიის წარმომადგენლების დახმარებას საჯარო ინფორმაციის გამოთხოვნასთან დაკავშირებით.
ინფორმაციის თავისუფლების განვითარების ინსტიტუტის დირექტორმა გიორგი კლდიაშვილმა შეხვედრაზე დამსწრე საზოგადოებას წარუდგინა ფონდ „ღია საზოგადოების ინსტიტუტის“ და არასამთავრობო ორგანიზაცია „ამერიკის ეროვნული უსაფრთხოების არქივის“ მიერ დაფინანსებული პროექტის “საქართველოს საჯარო დაწესებულებების საინფორმაციო რესურსების მონიტორინგის“ პირველადი შედეგები. მისი თქმით ინსტიტუტის ექსპერტთა ჯგუფის მიერ ჩატარდა 5 სამინისტროს (შსს, საგარეო საქმეთა, შრომის, ჯანმრთელობის და სოციალური დაცვის, გარემოს დაცვის და ბუნებრივი რესურსების სამინისტროების) და 13 შესაბამისის სსიპ-ის მონიტორინგი. მონიტორინგის პირველადი შედეგების მიხედვით ოფიციალური ვებ-გვერდების ინტერნეტ-გამჭირვალობის ინდექსი არ აჭარბებს 30%-ს. კვლევის ამ ეტაპზე ყველაზე დაბალი რეიტინგი მიენიჭა „ადამიანითა ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდს“ (8.72%). ხოლო ყველაზე მაღალი რეიტინგით დაფიქსირდა „გარემოს დაცვისა და ბუნებრივი რესურსების სამინისტრო“ (პროცენტული მაჩვენებელი - 31.68).
შეხვედრის დასასრულს გიორგი კლდიაშვილმა აღნიშნა, რომ უახლოეს მომავალში საზოგადოებას წარუდგენს კვლევის საბოლოო შედეგებს.
თანდართული ფაილები:
საჯარო უწყებების ვებ-რესურსების მონიტორინგი
სიახლეების გამოწერა
