საჯარო სამსახურის ახალი რეფორმის კონცეფცია, რომლის შემუშავებაში IDFI აქტიურად მონაწილეობდა, საზოგადოებას 1 ივლისს წარედგინა.

რეფომის მიზანია გამართული და გამჭვირვალე საჯარო სისტემის შექმნა. ის ათ კატეგორიას მოიცავს. ესენია: საჯარო სამსახურის განმარტება; საჯარო სამსახურში დასაქმებული პირები; საჯარო სამსახურის მართვის, კოორდინაციისა და ზედამხედველობის ცენტრალიზებული სისტემა; საჯარო სამსახურში მიღება; კლასიფიკაციის სისტემა; ანაზღაურების სისტემა; საჯარო მოხელეების მართვა; საჯარო მოხელეების უფლება-მოვალეობები; სწავლება და კვალიფიკაციის ამაღლება და თანაბარი შესაძლებლობები მამაკაცებისა და ქალებისთვის.

საჯარო სამსახურის ბიურომ ახალი პრემირების რეფორმაც შეიმუშავა და ის სახელმწიფომ უკვე დაამტკიცა.

ახალი კონცეფციის შემუშავებაზე სპეციალური ჯგუფი მუშაობდა, მათ შორის იყო ინფორმაციის თავისუფლების განვითარების ინსტიტუტი (IDFI) რომელიც სახელმწიფოს ანაზღაურების სისტემის რეგულირების და კონცეფციის შემუშავებისკენ დიდი ხნის მანძილზე მოუწოდებდა.

IDFI ჩართული იყო G-3-ის მხარდაჭერით განხორციელებულ პროექტში,  რომელიც მიზნად ისახავდა შეემუშავებინა საჯარო სამსახურის რეფორმის კონცეფცია და სამოქმედო გეგმა, რაც ხელს შეუწყობდა საქართველოში საჯარო სამსახურის თანამედროვე მოდელის ჩამოყალიბებას.

ზემოთაღნიშნული პროექტის ფარგლებში IDFI-მ გამოაქვეყნა რამდენიმე კვლევა, რომელიც საჯარო სექტორში არსებულ სხვადასხვა საკითხებს ეხებოდა, მაგალითად: საჯარო დაწესებულებებში დასაქმებულთა სტატისტიკა გენდერულ ჭრილში; დისციპლინური პასუხისმგებლობა საჯარო სამსახურში; საჯარო მოსამსახურეთა ანაზღაურების სისტემები და სხვა.