18 ნოემბერს, ინფორმაციის თავისუფლების განვითარების ინსტიტუტმა (IDFI), USAID-ის ეკონომიკური მმართველობის პროგრამის მხარდაჭერით, პროექტის „საჯარო-კერძო დიალოგის ხარისხის შეფასების მექანიზმი“ პრეზენტაცია გამართა.

ღონისძიების მონაწილეებს მისასალმებელი სიტყვით მიმართეს ინფორმაციის თავისუფლების განვითარების ინსტიტუტის აღმასრულებელმა დირექტორმა, გიორგი კლდიაშვილმა, საქართველოს ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა და USAID/საქართველოს ეკონომიკური ზრდის ოფისის ხელმძღვანელმა, მარიკა ოლსონმა. 

პროექტის მიზანია საჯარო და კერძო სექტორებს შორის დიალოგის ხარისხის შეფასების პრაქტიკის გაგრძელება, მოცემული მექანიზმის განვრცობა რეგიონებში და დიალოგის შესახებ ცნობიერების ამაღლება.

პროექტის ფარგლებში, IDFI შეაფასებს საკანონმდებლო აქტების შემუშავების პროცესში საჯარო-კერძო დიალოგის ხარისხს. შეფასება განხორციელდება სამი წლის განმავლობაში. პროექტის განხორციელების პირველ წელს    შეფასდება 8 კანონი და 8 კანონქვემდებარე აქტი ცენტრალურ დონეზე და 3 რეგულაცია მუნიციპალურ დონეზე.

საჯარო და კერძო დიალოგის ხარისხი ფასდება საკანონმდებლო აქტის შემუშავების ოთხ ეტაპზე:

- პოლიტიკის ზოგადი მიმართულებების შემუშავების ეტაპი;
- კანონის/რეგულაციის ტექსტზე მუშაობის ეტაპი;
- ინფორმაციის გავრცელება და კომენტარები საზოგადოების მხრიდან;
- Ex-ante რეგულირების გავლენის შეფასების ეტაპი.

დაინტერესებული მხარეების გამოკითხვის შემდეგ შემუშავდება ანგარიში, რომელშიც ასახული იქნება ყველა შერჩეული კანონის/რეგულაციის საჯარო-კერძო დიალოგის ხარისხის შეფასება.

ღონისძიების ფოტო გალერეა იხილეთ აქ