ინფორმაციის თავისუფლების განვითარების ინსტიტუტი (IDFI) 2013 წლიდან თანამშრომლობს ეროვნული მეხსიერების ინსტიტუტთან (ვარშავა) კომუნიზმის მსხვერპლთა სიის შესაქმნელად, ბიბლიოგრაფიული ინფორმაციის გასაცვლელად და მსხვერპლთა საფლავების აღმოსაჩენად. ეროვნული მეხსიერების ინსტიტუტი დაარსდა პოლონეთის პარლამენტის მიერ 1998 წლის 18 დეკემბერს.

მეხსიერების ინსტიტუტის შექმნის რეზოლუცია, რომელიც მიიღო საპარლამენტო უმრავლესობის მქონე პარტიათა კოალიციამ, იყო მცდელობა, მოგვარებულიყო კომუნისტური სახელმწიფო უშიშროების ორგანოების მიერ დატოვებული დოკუმენტების პრობლემა. მიზნის მისაღწევად გადაწყდა აპოლიტიკური და დამოუკიდებელი დაწესებულების ჩამოყალიბება.

მეხსიერების ინსტიტუტი ჩაიბარებდა კომუნისტური პოლიტიკური პოლიციის არქივებს, რომლებსაც მანამდე საიდუმლო სამსახური აკონტროლებდა, და მასში შემავალი დოკუმენტების გაცნობის საშუალებას მისცემდა იმ ადამიანებისთვის, ვისზეც ხორციელდებოდა დაკვირვება. მოქალაქეებს მანამდე არ შეეძლოთ საკუთარი „ფაილების“ ნახვა. შეგროვებული დოკუმენტები ასევე უნდა გამოყენებულიყო იმ ხალხის წარსულის შესამოწმებლად, რომლებიც საჯარო პოზიციებს იკავებდნენ.

ეროვნული მეხსიერების ინსტიტუტი არის სპეციალური დაწესებულება, რომელსაც გააჩნია სახელმწიფო და მართლმსაჯულების ადმინისტრირების, არქივის, აკადემიური ინსტიტუტის, საგანმანათლებლო ცენტრისა და შემმოწმებელი ორგანოს ფუნქციები.