14 ივლისს, გაიმართა ღია მმართველობის მუდმივმოქმედ საპარლამენტო საბჭოსა და აჭარის უმაღლესი საბჭოს ღია მმართველობის საბჭოს შორის შეხვედრა. შეხვედრა ჩატარდა დისტანციურად, და მისი მიზანი ღია მმართველობის პარტნიორობაში საკანონმდებლო ორგანოების ჩართულობის შესახებ გამოცდილების გაზიარება იყო.

საქართველოს პარლამენტის წევრებმა კახა კუჭავამ და გიორგი კახიანმა ისაუბრეს საპარლამენტო ღიაობაზე, ღია მმართველობის მუდმივმოქმედი საპარლამენტო საბჭოს გამოცდილებაზე, ფუნქციებზე, გამოწვევებზე, სამოქმედო გეგმებისა და ანგარიშების შემუშავების პროცესებზე.

შეხვედრაზე საპარლამენტო საბჭოს სამდივნოს წარმომადგენელმა, ნინო მაყაშვილმა, ღია მმართველობის საბჭოს წევრებსა და უმაღლესი საბჭოს საორგანიზაციო დეპარტამენტს გაუზიარა საპარლამენტო საბჭოს საქმიანობის დაგეგმვის, ორგანიზებისა და დაინტერესებული პირების ჩართულობის უზრუნველყოფის შესახებ გამოცდილება.

აჭარის უმაღლესი საბჭოდან შეხვედრას ესწრებოდნენ ღია მმართველობის საბჭოს წევრი დეპუტატები და აჭარის უმაღლესი საბჭოს თავმჯდომარე - დავით გაბაიძე. შეხვედრაში, ასევე, მონაწილეობას იღებდნენ საპარლამენტო საბჭოს სამდივნოს და უმაღლესი საბჭოს აპარატისა და საორგანიზაციო და საქმისწარმოების დეპარტამენტის, გაეროს განვითარების პროგრამისა (UNDP)  და ინფორმაციის თავისუფლების განვითარების ინსტიტუტის (IDFI) წარმომადგენლები.

აჭარის ავტონომიური რესპუბლიკის უმაღლესი საბჭოს ღია მმართველობის საბჭოს მხარდამჭერია ევროკავშირისა (EU) და გაეროს განვითარების პროგრამის (UNDP) ერთობლივი პროექტი „საპარლამენტო დემოკრატიის კონსოლიდაცია საქართველოში“. პროექტი მჭიდროდ თანამშრომლობს ინფორმაციის თავისუფლების განვითარების ინსტიტუტთან (IDFI), საქართველოს პარლამენტსა და აჭარის ავტონომიური რესპუბლიკის უმაღლეს საბჭოში ღია მმართველობის პრინციპების დანერგვის ხელშეწყობის მიზნით.