2021 წლის 6 ივლისს, ინფორმაციის თავისუფლების განვითარების ინსტიტუტმა (IDFI), ევროკავშირის მხარდაჭერით, გამართა ონლაინ სამუშაო შეხვედრა Covid-19 პანდემიასთან დაკავშირებული სახელმწიფო შესყიდვების შესახებ.

ღონისძიების მიზანი იყო პანდემიასთან დაკავშირებული სახელმწიფო შესყიდვების ხელმისაწვდომობის კუთხით არსებული გამოწვევებისა და მათი გადაჭრის გზების განხილვა საჯარო დაწესებულებების, მედიისა და სამოქალაქო საზოგადოების წევრების ჩართულობით. 

ღონისძიება გახსნა და მოდერაციას უწევდა პროექტის კოორდინატორი, თეონა ტურაშვილი. მისასალმებელი სიტყვების შემდეგ, მოხსენებები გააკეთეს IDFI-ის, საქართველოს რეფორმების ასოციაციისა (GRASS​) და სტუდია მონიტორის წარმომადგენლებმა.

IDFI-ის ანალიტიკოსმა, მარიამ გოგიაშვილმა წარმოადგინა კორონავირუსთან დაკავშირებული სახელმწიფო შესყიდვების მონიტორინგისას გამოვლენილი სისტემური პრობლემების შესახებ მთავარი მიგნებები. საკუთარი გამოცდილების შესახებ ისაუბრეს GRASS-ის უფროსმა ანალიტიკოსმა, ნაზიბროლა რეხვიაშვილმა და სტუდია მონიტორის გამომძიებელმა ჟურნალისტმა, მარიკა დუდუნიამ. მომხსენებლების მიერ ხაზგასმული პრობლემური გამოცდილებები შესყიდვების საჯაროობასთან და მონიტორინგის სირთულეებთან დაკავშირებით მეტწილად მსგავსი აღმოჩნდა. ძირითად პრობლემებად დასახელდა CMR და SMP მოდულებში ატვირთული დოკუმენტების დაკავშირების შეუძლებლობა, რამდენიმე უწყების მხრიდან გამარტივებული შესყიდვის ხელშეკრულებების საჯაროობა და გადაუდებელი აუცილებლობის დასაბუთების ბუნდოვანი სტანდარტი.

მოხსენებების შემდგომ, დისკუსიის რეჟიმში საჯარო დაწესებულებების, მათ შორის სახელმწიფო შესყიდვების სააგენტოს წარმომადგენლების ჩართულობით მოხდა მიმდინარე გამოწვევების განხილვა. მათი გადაჭრის ალტერნატივები წარმოადგინეს მომხსენებლებმა, როგორც ელექტრონულ სისტემაში ცვლილებების შეტანის, ისე საკანონმდებლო რეგულაციების დახვეწის გზით. ამასთან, დისკუსიის ერთ-ერთი მონაწილის მხრიდან გაჟღერდა შეთავაზება შესყიდვების სააგენტოსა და სამოქალაქო საზოგადოების პერმანენტული შეხვედრების შესახებ, რაც ყველა მონაწილემ გაიზიარა. 

ასევე, IDFI-მ სამოქალაქო საზოგადოებასა და საჯარო უწყებებს გააცნო სისტემის გაუმჯობესების შესახებ გარკვეული შეთავაზებები, მათ შორის, კოვიდთან დაკავშირებული შესყიდვების ცაკლე მოდულად გამოტანა და გამარტივებული შესყიდვის ხელშეკრულებების ბაზაში SMP კოდით ძებნის შესაძლებლობა.

ონლაინ სამუშაო შეხვედრა ჩატარდა პროექტის - „კოვიდ-19-თან დაკავშირებული სახელმწიფო ხარჯების და ადამიანის უფლებების მდგომარეობის მონიტორინგი“ - ფარგლებში, რომელსაც IDFI, ევროკავშირის მხარდაჭერით, 2020 წლის ივლისიდან ახორციელებს.