20 მაისს გაიმართა საქართველოს ღია პარლამენტის სამუშაო ჯგუფის მონაწილე საერთაშორისო და არასამთავრობო ორგანიზაციების წარმომადგენლების შეხვედრა საპარლამენტო ღიაობასთან დაკავშირებით. შეხვედრა ხორციელდებოდა „ღია მმართველობის პარტნიორობის“ ინიციატივაში „საქართველოს პარლამენტის ჩართულობის” მხარდაჭერის პროექტის ფარგლებში, რომლის ინიციატორი იყო ინფორმაციის თავისუფლების განვითარების ინსტიტუტი (IDFI).

შეხვედრაზე, რომელსაც IDFI-ს გამგეობის თავჯდომარე ლევან ავალიშვილი უძღვებოდა, განხილული იყო საერთაშორისო და არასამთავრობო ორგანიზაციების მიერ წარმოდგენილი რეკომენდაციები, რომელიც უნდა შემუშავდეს საპარლამენტო ღიაობის სამოქმედო გეგმისთვის.

საერთაშორისო გამჭირვალობა საქართველოს საპარლამენტო მდივანმა ლიკა საჯაიამ განიხილა რეკომენდაციები პარლამენტის ღიაობის დეკლარაციასთან მიმართებაში. მან აგრეთვე ისაუბრა იმ რეკომენდაციებზე, რომელიც საერთაშორისო გამჭირვალობა საქართველოს გააჩნია საპარლამენტო ღიაობის სამოქმედო გეგმასთან მიმართებაში.

სამოქალაქო საზოგადოების ინსტიტუტის ხელმძღვანელმა ვაჟა სალამაძემ ისაუბრა ვალდებულებებზე, რომელიც უნდა აიღოს საქართველოს პარლამენტმა. „ხელისუფლებამ უნდა აიღოს ვალდებულება, იმისათვის, რომ ხელი შეუწყოს სამოქალაქო საზოგადოებრივი ორგანიზაციების განვითარებას და ჩართულობას“, აღნიშნა მან.

IDFI-მ შეხვედრის მონაწილეებს გააცნო რამდენიმე რეკომენდაცია, რომელიც მოიცავს: პარლამენტისათვის ელექტრონული პეტიციის (როგორც განცხადებები, ისე საკანონმდებლო ინიციატივები) წარდგენის დანერგვას პარლამენტის ვებ-გვერდის მეშვეობით; ელექტრონული კონსულტაციების სისტემის შემუშავებას, რომელიც შესაძლებლობას მისცემს პარლამენტს კონსულტაციები გაუწიოს ნებისმიერ დაინტერესებულ ფიზიკურ თუ იურიდიულ პირს კანონპროექტებთან დაკავშირებით; საქართველოს ბიუჯეტთან დაკავშირებული საკითხების განხილვაში მოქალაქეების ჩართულობასდა სხვა.

ინტერფრაქციული ჯგუფის და საქართველოს ღია პარლამენტის სამუშაო ჯგუფის შემდეგი შეხვედრა გაიმართება23 მაისს, ყაზბეგში. არასამთავრობო და საერთაშორისო ორგანიზაციების წარმომადგენლები წარადგენენ რეკომენდაციებს საპარლამენტო ღიაობის სამოქმედო გეგმისთვის.