ფოტოს ავტორი დარო სულაკაური

2017 წლის 2 მაისს, კლუბ „ლოლიტა“-ს საკონფერენციო დარბაზში გაიმართა საინფორმაციო შეხვედრა „მდგრადი განვითარების მიზნები და საქართველო“.

შეხვედრა ჩატარდა ინფორმაციის თავისუფლების განვითარების ინსტიტუტის (IDFI), საქართველოს მთავრობის ადმინისტრაციისა და გაეროს განვითარების პროგრამასთან (UNDP) თანამშრომლობით და შვედეთის მთავრობისა და აშშ-ის საერთაშორისო განვითარების სააგენტოს (USAID) ხელშეწყობით.

საინფორმაციო შეხვედრას ესწრებოდნენ მდგრადი განვითარების მიზნების (SDGs) შესახებ ინფორმაციის გავრცელების მიზნით გამოცხადებულ - ვიზუალიზაციისა და სტუდენტური ესეების კონკურსებში მონაწილეობის მსურველები.

შეხვედრა გახსნა IDFI-ის წარმომადგენელმა საბა ბუაძემ. გაეროს განვითარების პროგრამის (UNDP) მოქმედმა ხელმძღვანელმა საქართველოში შომბი შარპმა და საქართველოს მთავრობის ადმინისტრაციის სამთავრობო გეგმებისა და ინოვაციების სამსახურის უფროსმა ნინო სარიშვილმა ისაუბრეს მდგრადი განვითარების მიზნების საერთაშორისო და ეროვნულ მნიშვნელობაზე და საქართველოს როლზე ამ გლობალური დღის წესრიგის განხორციელებაში. 

შეხვედრის დასასრულს, IDFI-ის საზოგადოებასთან ურთიერთობის მენეჯერმა მერი მახარაშვილმა  მონაწილეებს კონკურსების პირობებისა და წარდგენილი ნამუშევრების შეფასების კრიტერიუმების შესახებ ესაუბრა.

ვიზუალიზაციისა და სტუდენტური ესეების კონკურსები გამოცხადდა 2017 წლის აპრილში. მათი მიზანია ინფორმაციის გავრცელება მდგრადი განვითარების მიზნებისა და საქართველოსთვის მათი მნიშვნელობის შესახებ.  

2017 წლის 21 მაისამდე კონკურსის მონაწილეებმა უნდა წარადგინონ ნამუშევრები შემდეგ ოთხ კატეგორიაში: ესე, ფოტო, პოსტერი და გრაფიტის ესკიზი. თითოეული ნამუშევარი უნდა ასახავდეს მდგრადი განვითარების ერთ-ერთ მიზანს. მონაწილეებს შეუძლიათ, წარადგინონ რამდენიმე ნამუშევარი სხვადასხვა მიზნებზე.

გამარჯვებულების გამოცხადება შედგება 2017 წლის ოქტომბერში, მდგრადი განვითარების მიზნების საერთაშორისო ფორუმზე. თითოეული გამარჯვებული მიიღებს 1000 ლარიან სასაჩუქრე ბარათს. 20 საუკეთესო გრაფიკული ნამუშევარი და 10 საუკეთესო ესე განთავსდება კონკურსების ორგანიზატორთა სოციალურ მედიაში. გრაფიტის საუკეთესო ესკიზის ავტორს შესაძლებლობა ექნება, გადაიტანოს თავისი ნამუშევარი სპეციალურად გამოყოფილ კედელზე თბილისში.