2022 წლის 16 ნოემბერს, ინფორმაციის თავისუფლების განვითარების ინსტიტუტმა (IDFI) და კვლევითმა ინსტიტუტმა, Gnomon Wise-მა საქართველოს უნივერსიტეტში, ციფრული უფლებებისა და წიგნიერების შესახებ ტრენინგი გამართეს. 

ტრენინგი გახსენეს Gnomon Wise-ის აღმასრულებელ დირექტორმა, ირინა გურგენაშვილმა და IDFI-ის ინტერნეტისა და ინოვაციების მიმართულების ხელმძღვანელმა, თეონა ტურაშვილმა. ორგანიზაციების საქმიანობის გაცნობის შემდეგ, ტრენინგი დაეთმო ციფრული უფლებებისა და წიგნიერების მნიშვნელოვან საკითხებს. კერძოდ, ტრენინგის პირველ ნაწილში, თეონა ტურაშილმა მონაწილეებს გააცნო ციფრული უფლებების არსი, საქართველოს კანონმდებლობის თავისებურებები ამ კუთხით, ასევე, თუ რა მთავარი ციფრული გამოწვევები იკვეთება საქართველოს შემთხვევაში საერთაშორისო თუ ადგილობრივი კვლევების მიხედვით. მონაწილეები ასევე გაეცნენ IDFI-ის ბოლო კვლევებსა და რეკომენდაციებს ციფრული უფლებების დაცვის საკანონმდებლო გარანტიების გაუმჯობესების თვალსაზრისით. 

ტრენინგის მეორე ნაწილს უძღვებოდა IDFI-ის ანალიტიკოსი, გვანცა ნიკურაძე, რომელმაც ტრენინგის მონაწილეებს გააცნო საჭირო რჩევები სხვადასხვა ციფრული პლატფორმის, სოციალური ქსელებისა და ელექტორნული მოწყობილობების უსაფრთხოდ გამოსაყენებლად. 

ტრენინგი ჩატარდა ინტერაქციულ ფორმატში. მონაწილეებს ჰქონდათ საშუალება დაესვათ კითხვები, გაეზიარებინათ საკუთარი მოსაზრებები და გამოცდილება ციფრული უსაფრთხოების პრაქტიკული და თეორიული საკითხების შესახებ.