2-4 აპრილს, ინფორმაციის თავისუფლების განვითარების ინსტიტუტის წარმომადგენლები პროექტის „გამჭვირვალე საჯარო შესყიდვების რეიტინგი - სახელმწიფო შესყიდვების კანონმდებლობისა და აღსრულების პროცესის შეფასება ევრაზიის რეგიონში და მის მიღმა“ სამუშაო ვიზიტით ეწვივნენ ბიშკეკს, ყირგიზეთს.

ვიზიტის ფარგლებში, IDFI-ის და მისი პარტნიორი ორგანიზაციის Kyrgyzstan Forum on Official Development Assistance (FODA) წარმომადგენლებმა შეხვედრები გამართეს ყირგიზეთის მთავრობის, პარლამენტისა და სამოქალაქო საზოგადოების წარმომადგენლებთან. ვიზიტის მიზანი იყო IDFI-ს და FODA-ს მიერ შემუშავებული ყირგიზეთის სახელმწიფო შესყიდვების კანონმდებლობის შეფასების წარდგენა სხვადასხვა დაინტერესებული მხარეებისთვის.

სამუშაო შეხვედრა გაიმართა ფინანსთა სამინისტროს სახელმწიფო შესყიდვების დეპარტამენტის წარმომადგენლებთან, მათ შორის დეპარტამენტის ხელმძღვანელთან ულან ოზუმბეკოვთან. შეხვედრისას, IDFI-მ და FODA-მ განიხილეს პროექტის ფარგლებში ყირგიზეთის სახელმწიფო შესყიდვების კანონმდებლობის შეფასება, წარადგინეს კვლევის შედეგები და რეკომენდაციები (საკანონმდებლო ცვლილებების პაკეტი). სახელმწიფო შესყიდვების დეპარტამენტმა მზაობა გამოთქვა FODA-სთან ერთად ემუშავა აღნიშნულ ცვლილებებზე და ღია მმართველობის პარტნიორობის (OGP) ფარგლებში რიგი ცვლილებების ვალდებულებად აღების საკითხი განეხილა.

3 აპრილს გაიმართა მრგვალი მაგიდა, სადაც კვლევის შედეგები წარედგინა არასამთავრობო ორგანიზაციების წარმომადგენლობებს. კვლევის წარდგენასთან ერთად, განხილული იყო საკანონმდებლო ცვლილებების პაკეტი და OGP-ის როლი სახელმწიფო შესყიდვების სისტემის გაუმჯობესების პროცესში.

ვიზიტის ბოლო დღეს, გაიმართა შეხვედრა ყირგიზეთის პარლამენტის (ჟოგორკუ-კენეში) დეპუტატთან - აიდა ისმაილოვასთან. დეპუტატთან განხილული იყო IDFI-სა და FODA-ს მიერ მომზადებული საკანონმდებლო ცვლილებების პაკეტის პარლამენტისთვის წარდგენის და მხარეებს შორის თანამშრომლობის შესაძლებლობა.