22 ნოემბერს, ინფორმაციის თავისუფლების განვითარების ინსტიტუტის (IDFI) პროგრამების დირექტორმა - ლევან ავალიშვილმა, კორუფციასთან ბრძოლის სასერტიფიკატო პროგრამის ფარგლებში ბაკალავრიატის ჯგუფისთვის ჩაატარა ლექცია ინფორმაციის თავისუფლებაზე.

ლევანი კურსის მონაწილეებს ესაუბრა საჯარო ინფორმაციის მნიშვნელობაზე, სამართლებრივ ჩარჩოსა და საქართველოში დამკვიდრებულ საჯარო ინფორმაციის გამოთხოვის მექანიზმებზე. ლექცია წარიმართა ინტერაქციულ რეჟიმში, რომლის დროსაც განხილულ იქნა საჯარო ინფორმაციის გამოთხოვის პრაქტიკული მაგალითები. ლევანმა სტუდენტებთან ერთად ლექციის მსვლელობისას აქტიურად განიხილა თუ რა სახის გამოწვევების წინაშე შესაძლოა იდგეს საქართველოში ინფორმაციის თავისუფლება.

კორუფციასთან ბრძოლის სასერტიფიკატო პროგრამის განხორციელება „ინფორმაციის თავისუფლების განვითარების ინსტიტუტმა“ (IDFI) 2019 წლიდან დაიწყო ილიას სახელმწიფო უნივერსიტეტთან თანამშრომლობით.

სამი წლის განმავლობაში პროგრამას ფინანსურ მხარდაჭერას უწევდა ღია საზოგადოების მხარდაჭერის ფონდი პროექტის „მდგრადი ადამიანური რესურსების განვითარება კორუფციასთან საბრძოლველად“ ფარგლებში. ხოლო ახლა პროგრამა ფინანსურად მხარდაჭერილია შვედეთის საერთაშორისო განვითარების თანამშრომლობის სააგენტოს (Sida) მიერ, ორგანიზაციული მხარდაჭერის ფარგლებში.