2023 წლის 7-10 დეკემბრის პერიოდში, საქართველოში ნიდერლანდების საელჩოს MATRA პროგრამის მხარდაჭერით, IDFI-მ ჩაატარა საჯარო ინფორმაციის უფლების პრაქტიკულ-სიმულაციური სწავლება ჟურნალისტებისათვის. 

ღონისძიება ჩატარდა პროექტი „საჯარო ინფორმაციაზე მედიის ხელმისაწვდომობის გაზრდა საქართველოში“ ფარგლებში, რომლის მთავარი მიზანიც მტკიცებულებებზე დაფუძნებული ჟურნალისტიკის გაძლიერება და მხარდაჭერაა საჯარო ინფორმაციის ხელმისაწვდომობის სისტემურ სამართლებრივ და პრაქტიკულ გამოწვევებთან გამკლავების გზით. ჟურნალისტებისთვის საჯარო ინფორმაციაზე ხელმისაწვდომობის გაზრდა და საჯარო ინფორმაციის ხელმისაწვდომობის სისტემური სამართლებრივი დაბრკოლებების შემცირება პროექტის ერთერთ ამოცანას წარმოადგენს.  

საჯარო ინფორმაციის უფლების პრაქტიკულ-სიმულაციური სწავლების მიზანი იყო ჟურნალისტთა მედეგობის გაძლიერება საჯარო დაწესებულებების ინფორმაციის მოპოვებაზე დადგენილი ხელოვნური დაბრკოლებების მიმართ.

სწავლების ფარგლებში განხილულ საკითხებს შორის იყო: საჯარო ინფორმაციის სამართლებრივი ღირებულება დემოკრატიულ საზოგადოებაში; საჯარო ინფორმაციის გაცემაზე უარის შემდგომ არსებული სამართლებრივი და “არასამართლებრივი” მეთოდები: დეტექცია, დოკუმენტაცია ან/და გასაჩივრება; SLAPP საქმეებში ჟურნალისტთა წინააღმდეგ წარდგენილი მტკიცებულებები და საჯარო ინფორმაციის მოთხოვნის უფლება; საჯარო დაწესებულებების მიერ საჯარო ინფორმაციის განცხადებებზე რეაგირების თვალსაზრისით გამოვლენილი მნიშვნელოვანი ტენდენციები; ინფორმაციის თავისუფლების შესახებ ახალი კანონის საჭიროება და სხვა.  სწავლების ფარგლებში მონაწილეებმა წარმატებით შეასრულეს, რეალურ გამოწვებზე დაყრდნობით შექმნილი პრაქტიკული სავარჯიშოები. 

4 დღიანი ინტენსიური კურსის ტრენერები მაია კოპალეიშვილი, ივანე ჯავახიშვილის სახელობის თბილისის სახელმწიფო უნივერსიტეტის პროფესორი, საკონსტიტუციო სასამართლოს ყოფილი მოსამართლე, ედუარდ მარიკაშვილი, საქართველოს დემოკრატიული ინიციატივის (GDI) თავმჯდომარე, გიორგი დავითური, IDFI-ს კანონის უზენაესობისა და მედიის თავისუფლების მიმართულების ხელმძღვანელი, გოგა თუშურაშვილი, IDFI-ს კვლევითი მიმართულების ხელმძღვანელი.

საჯარო ინფორმაციის უფლების პრაქტიკულ-სიმულაციურ სწავლებაში მონაწილეობას იღებდნენ გამომძიებელი ჟურნალისტები და მედიის წარმომადგენლები როგორც თბილისიდან, ისე საქართველოს სხვადასხვა რეგიონიდან. კერძოდ: სამცხე-ჯავახეთიდან, იმერეთიდან, კახეთიდან, აჭარიდან, შიდა და ქვემო ქართლიდან. ღონისძიებაში მონაწილეობა მიიღო 15 სხვადასხვა მედია საშუალების წარმომადგენელმა.