21, 22 და 23 ივნისს, ინფორმაციის თავისუფლების განვითარების ინსტიტუტმა (IDFI) ქუთაისში, ოზურგეთსა და ზუგდიდში გამართა ტრენინგები, თემაზე - ხელისუფლების საქმიანობის მონიტორინგის მეთოდები და მექანიზმები.

ტრენინგებს რეგიონებში მოღვაწე სამოქალაქო საზოგადოებრივი ორგანიზაციების წარმომადგენლები, აქტივისტები, ჟურნალისტები და სტუდენტები ესწრებოდნენ.

ტრენინგის სესიებს უძვებოდნენ IDFI-ის ადგილობრივი მმართველობის, ინტერნეტისა და ინოვაციების მიმართულებების ხელმძღვანელი, თეონა ტურაშვილი, კვლევითი მიმართულების ხელმძღვანელი, გოგა თუშურაშვილი და ანალიტიკოსი, მარიამ გოგიაშვილი.

ტრენინგის მონაწილეებმა მიიღეს როგორც პრაქტიკული, ისე თეორიული ცოდნა მონიტორინგის ისეთი მექანიზმების ირგვლივ, როგორებიცაა:

- როგორ აღმოვაჩინოთ საეჭვო გარემოებები საჯარო შესყიდვებში;

- როგორ დავაკვირდეთ ადგილობრივი ხელისუფლების მიერ ბიუჯეტის განკარგვას და მის ფინანსურ საქმიანობას;

- როგორ მოვიპოვოთ ოფიციალური მონაცემები სხვადასხვა სახელმწიფო პლატფორმიდან;

- როგორ მოვითხოვოთ (ადგილობრივ) ხელისუფლებაზე ზედამხედველობისთვის საჭირო საჯარო ინფორმაცია.

გარდა ამისა, მონაწილეები გაეცნენ საქართველოში ციფრულად მოწყვლადი ჯგუფების გამოწვევებსა და საჭიროებებს, მიიღეს რეკომენდაციები, რომლებიც პროექტების დაგგემვისა და განხორციელების ეტაპებზე მათი საჭიროებების გათვალისწინებაში დაეხმარებათ.

ღონისძიება ინტერაქტიულ რეჟიმში წარიმართა და მოიცავდა თეორიისა და პრაქტიკის ნაზავს. მონაწილეებმა იმუშავეს პრაქტიკულ შემთხვევებზე და გამართეს შესაბამისი დისკუსიები.

ტრენინგების ბოლოს მონაწილეებს მიეწოდათ ინფორმაცია IDFI-ის მიმდინარე ანალიტიკური სტატიების კონკურსზე, რომლის ფარგლებშიც ნებისმიერ დაინტერესებულ პირს, საჯარო მონაცემების გამოყენებით, შეუძლია მოამზადოს ანალიზი. ანალიტიკური სტატიების კონკურსის სამი გამარჯვებული შესაბამის ფულად ჯილდოს მიიღებს.

ღონისძიებები გაიმართა პროექტის - ღია მონაცემების სტანდარტების ამაღლება და გამოყენების წახალისება საქართველოში - ფარგლებში. პროექტი დაფინანსებულია საერთაშორისო მედიის მხარდაჭერის (IMS - International Media Support) მიერ.