2024 წლის დეკემბერიდან საჯარო სამსახურში განსაკუთრებით გააქტიურდა საჯარო მოხელეთა დევნა, რომელიც ძირითადად მათ მიერ საჯაროდ გამოხატულ პოზიციას უკავშირდებოდა. დეკემბერში, ქართულმა ოცნებამ დააინიცირა და მიიღო რეპრესიული ცვლილებები “საჯარო სამსახურის შესახებ” კანონში, რომლითაც პროფესიულ საჯარო სამსახურში დასაქმებულ მენეჯერულ რგოლს მოუხსნეს დამოუკიდებლობის უმნიშვნელოვანესი, განუსაზღვრელი ვადით თანამდებობაზე დანიშვნის საკანონმდებლო გარანტია და იძულებით გადაიყვანეს ადმინისტრაციულ ხელშეკრულებებზე.

აღნიშნულის პარალელურად, ქართულმა ოცნებამ არსებითად გაამარტივა საჯარო სამსახურში მასობრივი წმენდის ჩასატარებლად საჭირო რეორგანიზაციის პროცედურა, ხოლო 2025 წლის იანვრიდან აქტიურად დაიწყო პარტიული ნდობის არმქონე საჯარო მოხელეთა გათავისუფლება. 

2025 წლის 3 თებერვალს, საჯარო სამსახურის ბიუროს თანამშრომლებმა გაავრცელეს განცხადება მოსალოდნელ საკანონმდებლო ცვლილებებზე, რომლითაც საჯარო სამსახურის ბიურო გაუქმდება და მის ფუნქციებს მთავრობის ადმინისტრაცია შეითავსებს. 

საჯარო სამსახურის ბიუროს ფუნქციას წარმოადგენს პროფესიული და ეთიკური საჯარო სამსახურის ჩამოსაყალიბებლად საჭირო სტრატეგიისა და რეფორმების შემუშავება, ისევე როგორც მისი აღსრულებისთვის საჭირო ღონისძიებების კოორდინაცია. ამ ორგანოს ლიკვიდაცია და მისი ფუნქციების პოლიტიკური ორგანოებისთვის გადაცემა ქართული ოცნების მიერ დაწყებული რეპრესიების ლოგიკური გაგრძელებაა. 

IDFI-ის მოსაზრებით, ქართული ოცნების მიერ საჯარო სამსახურში დაწყებული რეპრესიების მიზანია პოლიტიკური წმენდა. როგორც არსებული გარემოებებიდან იკვეთება, პრიორიტეტულ სამიზნეს წარმოადგენენ ადამიანები, რომლებმაც ამა თუ იმ ფორმით დააფიქსირეს თავიანთი ჯანსაღი პოზიცია საქართველოს კონსტიტუციის დარღვევაზე, ადამიანთა წამებასა თუ არაადამიანურ მოპყრობაზე. მოსალოდნელია, რომ შემდგომი ეტაპი იქნება საჯარო მოხელეების პარტიისადმი ლოიალური პირებით ჩანაცვლება.