11 დეკემბერს ინფორმაციის თავისუფლების განვითარების ინსტიტუტმა (IDFI) და ფონდმა ღია საზოგადოება საქართველომ (OSGF) გამართა ანგარიშის პრეზენტაცია, რომელშიც შეჯამებულია ინფორმაციის თავისუფლების მდგომარეობა საქართველოში 2010-2015 წლებში. ღონისძიება არაერთმა მედია საშუალებამ გააშუქა.

გადაცემაში "მთავარი" IDFI-ს დირექტორმა, გიორგი კლდიაშვილმა ისაუბრა საჯარო ინფორმაციის ხელმისაწვდომობაზე საქართველოში და დღეისთვის არსებულ ტენდენციებზე ამ კუთხით. 

რადიო თავისუფლებაში, გადაცემა "დილის საუბრების" ეთერში IDFI-ს გამგეობის თავმჯდომარემ, ლევან ავალიშვილმა ყურადღება გაამახვილა ბოლო ხუთი წლის განმავლობაში საჯარო უწყებების მიერ ინფორმაციის გაცემის ხარისხზე. მან აღნიშნა, რომ ხელისუფლების ცვლილების შემდეგ წელიწადს ძალიან გაიზარდა ღიაობა - მათ შორის, პრემიების შესახებ ინფორმაციის გაცემა, რაც მოგვიანებით მკვეთრად შეიცვალა. 

საზოგადოებრივ მაუწყებელთან საუბარში ლევან ავალიშილმა განაცხადა: "ტენდენციები, წინა წლებთან შედარებით, გაუმჯობესებულია, თუმცა, მაინც არის პრობლემური უწყებები და ეს სერიოზული პრობლემაა, რადგან არ ასრულებენ კანონით მათზე დაკისრებულ მოვალეობას" 

რუსთავი 2-თან ინტერვიუში გიორგი კლდიაშვილმა აღნიშნა: "საჯარო ინფორმაციის ხელმისაწვდომობის თვალსაზრისით გაუარესება არის იუსტიციის სამინისტროსა და გარკვეულწილად, მთავრობის ადმინისტრაციაშიც", ხოლო ტელეკომპანია მაესტროსთვის უფრო საინტერესო აღმოჩნდა ის, რომ 50-ზე მეტ უწყებას აქვს გამჭვირვალობის 100%_იანი მაჩვენებელი. 

გიორგი კლდიაშილმა იმედთან საუბარში განაცხადა: "ინფორმაციის გამჭვირვალობის ხარისხის გაუარესება საგრძნობია ეკონომიკისა და მდგრადი განვითარების სამინისტროში, ასევე იუსტიციის სამინისტროსა და მთავრობის ადმინისტრაციაში"

ლიბერალმა ყურადღება გაამახვილა იმაზე, რომ 2012 წლის არჩევნების შემდეგ მნიშვნელოვნადაა გაუმჯობესებული საჯარო ინფორმაციის ხელმისაწვდომობის დონე, თუმცა IDFI-ის მონაცემებით, 2014 წელთან შედარებით 2015 წელს მნიშვნელოვნად გააუარესეს ხელმისაწვდომობის მაჩვენებელი იუსტიციის სამინისტრომ - 46%-ით, ეკონომიკისა და მდგრადი განვითარების სამინისტრომ - 50%-ით და მთავრობის ადმინისტრაციამ 75%-ით. 

“2015 წლის მონაცემებით ყველაზე დახურული საჯარო დაწესებულებად დასახელდა საქართველოს ეკონომიკისა და მდგრადი განვითარების სამინისტრო, რომელმაც 44 მოთხოვნა დატოვა უპასუხოდ”- ვკითხულობთ ტაბულას სტატიაში.

ღონისძიება და ხუთწლიანი ანგარიშის შედეგები ასევე გააშუქეს სხვა მედია გამოცემებმაც:

News.ge; Guardian.ge; Dfwatch.net ; DigitalReport; Ghn.ge ; Bpn.ge ; MediaNews.ge ; Apsny.ge ; Ipress.ge