13 მაისს ივანე ჯავახიშვილის სახელობის თბილისის სახელმწიფო უნივერსიტეტში IDFI-მ მონაწილეობა მიიღო არასამთავრობო ორგანიზაციების წარმომადგენლებსა და სტუდენტებს შორის გამართულ შეხვედრაში.

შეხვედრა თბილისში ერთკვირიანი სწავლების კურსის ფარგლებში ხორციელდებოდა ბელორუსი, ფინელი და ქართველი სტუდენტებისთვის. ისეთი საკითხების შესახებ, როგორიცაა გენდერული თანასწორობა, კორუფცია, რელიგიური, სექსუალური თუ ეთნიკური უმცირესობები, დემოკრატიული ინსტიტუტები, და სხვა სტუდენტები ვრცელ ნაშრომებს ამზადებენ. იმისათვის, რომ მათ ჰქნოდათ საშუალება აღნიშნულ თემებზე ინდივიდუალურად დაესვათ კითხვები და მიეღოთ საჭირო ინფორმაცია სამოქალაქო სექტორის წარმომადგენლებისგან, შეხვედრაზე ხუთი სხვადასხვა მიმართულებით მომუშავე არასამთავრობო ორგანიზაცია იყო მიწვეული, მათ შორის IDFI.

ორგანიზაციის წარმომადგენლები სხვადასხვა ეროვნების სტუდენტებით დაკომპლექტებულ 6 ჯგუფს თავისი საქმიანობის შესახებ ესაუბრნენ, გააცვნეს კვლევა - „საჯარო დაწესებულებებში დასაქმებულთა სტატისტიკა გენდერულ ჭრილში“ , რომელიც IDFI-მ 2013 წლის ოქტომბერში გამოაქვეყნა. მოკლედ წარუდგინეს აბორტების სტატისტიკის შედეგები, რომელთა შესახებ ინფორმაცია შრომის, ჯანმრთელობისა და სოციალური დაცვის სამინისტროდან ინსტიტუტმა ახლახანს მიიღო.

ეკონომიკურ საკითხებზე მსჯელობისას სტუდენტები დაინტერესდნენ კვლევით - „რუსული კაპიტალი ქართულ ბიზნესში“, რომელზეც ინფორმაცია მათ უკვე ჰქონდათ.

შეხვედრა Coffee Meeting-ის ფორმატში მიმდინარეობდა, რომელიც ახალ უმაღლეს სასწავლო-საგანმანათლებლო ფორმატად მიიჩნევა და სადაც სტუდენტები ინტერვიუს რეჟიმში საუბრობენ მათთვის საინტერესო წყაროებთან.

შეხვედრა ორგანზებული იყო ჰელსინკის უნივერსიტეტისა და ბალტიის ზღვისპირა რეგიონის კავკასიური ქსელის მიერ.