2015 წლის 24 ივლისს, OpeningParliament.org-მა „ინფორმაციის თავისუფლების განვითარების ინსტიტუტი“ (IDFI) შეიყვანა საპარლამენტო ღიაობის დეკლარაციის მხარდამჭერ ორგანიზაციათა ჩამონათვალში.

OpeningParliament.org არის საპარლამენტო მონიტორინგის განმახორციელებელი ორგანიზაციების ფორუმი. ფორუმის შექმნა მიზნად ისახავს ხელი შეუწყოს საპარლამენტო მონიტორინგის განმახორციელებელ ორგანიზაციებს ერთმანეთთან დაკავშირებასა და გამოცდილების გაზიარებაში.

აღსანიშნავია, რომ აღნიშნულ ფორუმზე განთავსებულია საპარლამენტო ღიაობის დეკლარაცია, რომელსაც საქართველოს პარლამენტი 2015 წლის 30 აპრილს შეუერთდა.

საპარლამენტო ღიაობის დეკლარაცია მოუწოდებს მსოფლიოს საკანონმდებლო ორგანოებს საპარლამენტო მონიტორინგის განმახორციელებელ ორგანოებთან მჭიდრო თანამშრომლობის საფუძველზე გაზარდონ საპარლამენტო ღიაობა და მოქალაქეთა ჩართულობა საპარლამენტო საქმიანობაში. აღნიშნული დეკლარაცია ასევე მოუწოდებს ყველა ქვეყნის პარლამენტს, რომ დანერგონ ელექტრონულ ტექნოლოგიები საპარლამენტო საქმიანობაში და ხელი შეუწყონ საპარლამენტო ინფორმაციის გამჭვირვალობას და ხელმისაწვდომობას.

OpeningParliament.org-ზე დასახელებულია საპარლამენტო ღიაობის დეკლარაციის მხარდამჭერი ორგანიზაციები მსოფლიოს 85 ქვეყნიდან. საქართველოდან საპარლამენტო მონიტორინგის განმახორციელებელ ორგანიზაციათა ჩამონათვალში მითითებული იყვნენ საერთაშორისო გამჭვირვალობა-საქართველო და ჯამპსტარტი ჯორჯია. აღნიშნულ ჩამონათვალს შეუერთდა „ინფორმაციის თავისუფლების განვითარების ინსტიტუტი“ (IDFI). აღსანიშნავია, რომ IDFI არის ერთადერთი ქართული ადგილობრივი არასამთავრობო ორგანიზაცია, რომელიც დასახელებულია საპარლამენტო ღიაობის დეკლარაციის მხარდამჭერ ორგანიზაციად.

IDFI არის აქტიურად ჩართული საპარლამენტო ღიაობის საქმიანობაში. კერძოდ, გაეროს განვითარების პროგრამა (UNDP) ინფორმაციის თავისუფლების განვითარების ინსტიტუტთან თანამშრომლობით (IDFI) და საქართველოს პარლამენტთან პარტნიორობით, ევროკავშირის (EU) მიერ დაფინანსებული პროგრამის “საპარლამენტო დემოკრატიის სისტემის გაძლიერება საქართველოში” ფარგლებში, ახორციელებს „ღია მმართველობის პარტნიორობის“ ინიციატივაში საქართველოს პარლამენტის ჩართულობის მხარდაჭერის“ პროექტს.

აღნიშნული პროექტის ფარგლებში შეიქმნა საპარლამენტო ღიაობის სამუშაო ჯგუფი და საქართველოს პარლამენტის ინტერფრაქციული ჯგუფი, რომელთა მიზანი იყო „საქართველოს ღია პარლამენტის სამოქმედო გეგმაზე“ მუშაობა.

IDFI ორგანიზებას უწევდა აღნიშნული ჯგუფების მუშაობას, მოამზადა კვლევა საპარლამენტო ღიაობის საკითხებზე „ღია მმართველობის პარტნიორობის“ (OGP) წევრ ქვეყნებში, ასევე, IDFI-ს ინიციატივით გაფორმდა მემორანდუმი „საქართველოს ღია პარლამენტის სამოქმედო გეგმის“ შემუშავებაში ჩართულობის თვალსაზრისით საქართველოს პარლამენტსა და საქართველოს ღია პარლამენტის სამუშაო ჯგუფში ჩართულ საერთაშორისო და არასამთავრობო ორგანიზაციებს შორის. ინტერფრაქციული ჯგუფის და საქართველოს ღია პარლამენტის სამუშაო ჯგუფის მუშაობის შედეგად შემუშავდა 2015-2016 წლებზე გათვლილი „საქართველოს ღია პარლამენტის სამოქმედო გეგმა“, რომელიც 2015 წლის 17 ივლისს დაამტკიცა საქართველოს პარლამენტის ბიურომ.