ინფორმაციის თავისუფლების განვითარების ინსტიტუტი (IDFI)  ახალგაზრდა იურისტთა ასოციაციასთან, საერთაშორისო გამჭვირვალობასთან და მედიაკოალიციასთან ერთად თავდაცვის სამინისტროს გამჭვირვალობის სტრატეგიის შემუშავებაში მონაწილეობს.
2013 წლის 10 იანვარს თავდაცვის სამინისტროში  გამჭვირვალობაზე მომუშავე არასამთავრობო ორგანიზაციების ჯგუფთან პირველი  სამუშაო შეხვედრა შედგა.

შეხვედრაში მონაწილეობა მიიღეს თავდაცვის  მინისტრმა ირაკლი ალასანიამ, მინისტრის მოადგილეებმა და თავდაცვის სამინისტროს სხვა ხელძღვანელმა პირებმა. მათ არასამთვრობოებს  სამომავლო გეგმები გააცნეს. განხილულ იქნა სამინისტროს მაქსიმალური ტრანსპარენტულობის მისაღწევად  განსახორციელებელი ღონისძიებები. გადაწყდა, რომ თანამშრომლობის ფორმატში კონცეპტუალური დოკუმენტების შემუშავების პროცესში სამოქალაქო საზოგადოება აქტიურ მონაწილეობას მიიღებს.

 არსამთავრობო ორგანიზაციებმა მათ მიერ განხორციელებული კვლევის შედეგები წარმოადგინეს და სამინისტროს გამჭვირვალობის გაუმჯობესების მიზნით რეკომენდაციები შესთავაზეს.

 გაცნობითი ხასიათის შეხვედრა თავდაცვის მინისტრმა  25 არასამთავრობო ორგანიზაციასა და ექსპერტთან 2012 წლის 5 დეკემბერს გამართა.

როგორც სამინისტროს, ასევე სამოქალაქო საზოგადოების წარმომადგენელთა მხრიდან გამოითქვა ურთიერთთანამშრომლობის სურვილი, შეიქმნა სამი სამუშაო ჯგუფი: თავდაცვის ტრანსფორმაციის, ნატოში ინტეგრაციისა და საერთაშორისო ოპერაციების და გამჭვირვალობასა და ადამიანის უფლებებზე მომუშავე ჯგუფები. 

შეხვედრები არსამთავრობო ორგანიზაციების წარმომადგენლებთან რეგულარულურად გაიმართება.